इंग्लंडमध्ये पटकावला 'चॅलेंज कप'
भारतीय क्रीडा प्राधिकरण आणि गोवा क्रीडा प्राधिकरण यांच्या संयुक्त विद्यमाने राष्ट्रीय स्नूकर स्पर्धा थिवी येथे २५ मे ते ५ जून दरम्यान पार पडणार आहे. या पार्श्वभूमीवर या क्रीडा प्रकारातील अव्वल भारतीय खेळाडूंचा परिचय करून देणारी ही लेखमाला.
तामिळनाडूच्या कोइम्बतूर येथील अवघ्या १८ वर्षांच्या श्रुती एल. हिने क्यू स्पोर्ट्स (बिलियर्ड्स आणि स्नूकर) मध्ये भारताचे नाव जागतिक स्तरावर सुवर्ण अक्षरात कोरले आहे. २०२१ मध्ये या खेळाला सुरुवात करणाऱ्या श्रुतीने अवघ्या चार वर्षांत राष्ट्रीय आणि आंतरराष्ट्रीय स्तरावर पदकांची लयलूट करत सर्वांचे लक्ष वेधून घेतले आहे.
श्रुतीने युनायटेड किंगडममधील वॉल्सल येथे झालेल्या ‘वर्ल्ड वूमेन्स बिलियर्ड्स चॅम्पियनशिप’मध्ये सलग दोन वर्षे (२०२४ आणि २०२५) भारताचे प्रतिनिधित्व केले. तिची सर्वात मोठी कामगिरी २०२५ मध्ये समोर आली, जेव्हा तिने वॉल्सल येथे प्रतिष्ठेचा ‘इंग्लिश ओपन चॅलेंज कप’ जिंकून आंतरराष्ट्रीय स्तरावर आपला दबदबा निर्माण केला. याशिवाय तिने दोहा येथील आशियाई स्नूकर चॅम्पियनशिप आणि ऑस्ट्रेलियातील ‘हे बॉल’ चॅम्पियनशिपमध्येही भारताचा तिरंगा फडकवला आहे.
श्रुतीने केवळ परदेशातच नव्हे, तर भारतातही आपली हुकूमत गाजवली आहे. २०२५-२६ मध्ये ज्युनियर गर्ल्स स्नूकरमध्ये आणि २०२४-२५ सब-ज्युनियर गर्ल्स बिलियर्ड्समध्ये सुवर्ण पदक पटकावले. तिने आतापर्यंत ज्युनियर आणि सब-ज्युनियर गटात अनेक सुवर्ण, रौप्य आणि कांस्य पदके पटकावली आहेत.
राज्य स्तरावर श्रुतीची कामगिरी थक्क करणारी आहे. तिने आतापर्यंत १३ सुवर्ण, ६ रौप्य आणि ४ कांस्य पदकांसह एकूण २३ पदके आपल्या नावावर केली आहेत. बिलियर्ड्स आणि स्नूकर या दोन्ही प्रकारात तिने दाखवलेली अष्टपैलू कामगिरी तिला भविष्यातील जागतिक चॅम्पियन म्हणून सिद्ध करत आहे.
भविष्यातील ‘चॅम्पियन’
२०२१ मध्ये खेळायला सुरुवात केल्यानंतर इतक्या कमी वेळात श्रुतीने गाठलेली ही उंची थक्क करणारी आहे. तिच्या या यशामुळे देशातील अनेक तरुणींना ‘क्यू स्पोर्ट्स’मध्ये येण्याची प्रेरणा मिळत आहे. श्रुतीचा हा प्रवास पाहता, भविष्यात ती भारतासाठी आणखी मोठी आंतरराष्ट्रीय विजेतेपदे घेऊन येईल, असा विश्वास क्रीडा क्षेत्रातील जाणकारांनी व्यक्त केला आहे.
