मुख्यमंत्री डॉ. प्रमोद सावंत यांच्याकडून ५० एकर अतिरिक्त जागेची घोषणा
पणजी: धारगळ येथील अखिल भारतीय आयुर्वेद संस्थेचा (AIIA) विस्तार करून तिथे लवकरच जागतिक दर्जाचे कर्करोग संशोधन केंद्र स्थापन करण्यात येणार आहे. या महत्त्वाकांक्षी प्रकल्पासाठी राज्य सरकारकडून अतिरिक्त ५० एकर जागा उपलब्ध करून दिली जाईल, अशी महत्त्वपूर्ण घोषणा मुख्यमंत्री डॉ. प्रमोद सावंत यांनी केली. धारगळ येथील संस्थेच्या कॅम्पसमध्ये आयोजित सुश्रूत शस्त्रक्रिया कक्ष आणि भौतिक उपचार विभागासह विविध नवीन सेवांच्या उद्घाटनप्रसंगी ते बोलत होते. यावेळी केंद्रीय आयुष राज्यमंत्री प्रतापराव जाधव यांची प्रमुख उपस्थिती होती.
याप्रसंगी बोलताना मुख्यमंत्री म्हणाले की, अखिल भारतीय आयुर्वेद संस्था आधुनिक आरोग्यसेवेसोबतच पारंपारिक भारतीय औषध पद्धतींना प्रोत्साहन देण्यासाठी कटिबद्ध आहे. या संस्थेतील १०० पदवीपूर्व जागांपैकी ५० टक्के जागा गोव्यातील विद्यार्थ्यांसाठी राखीव ठेवण्यात आल्या आहेत. यामुळे राज्यातील तरुणांना आयुर्वेद शिक्षणाच्या मोठ्या संधी उपलब्ध झाल्या आहेत. संस्थेमध्ये सुरू करण्यात आलेल्या नवीन सुविधांमुळे रुग्णसेवेत लक्षणीय वाढ होणार असून, विशेष आयुर्वेदिक उपचारांसाठी गोमंतकीयांना आता हक्काचे केंद्र मिळाले आहे. कर्करोग संशोधन केंद्रासोबतच तिथे केंद्रीय संशोधन प्रयोगशाळा आणि अद्ययावत औषधनिर्माण सुविधाही विकसित केल्या जाणार आहेत.
केंद्रीय आयुष राज्यमंत्री प्रतापराव जाधव यांनी पंतप्रधान नरेंद्र मोदी यांच्या नेतृत्वाखालील केंद्र सरकार आयुर्वेदाच्या प्रचारासाठी कटिबद्ध असल्याचे सांगितले. देशभरातील आयुष पायाभूत सुविधा अधिक बळकट करण्यासाठी मंत्रालय सातत्याने प्रयत्नशील असून, गोव्यातील या संस्थेमुळे सर्वांगीण आरोग्यसेवा वितरणाला मोठी मदत मिळेल, असा विश्वास त्यांनी व्यक्त केला. आयुष मंत्रालयाचे सचिव वैद्य राजेश कोटेचा यांनी आयुर्वेदाला मिळत असलेल्या जागतिक मान्यतेवर प्रकाश टाकला, तर प्रा. पी. के. प्रजापती यांनी संस्थेच्या वाढत्या क्षमतेबद्दल माहिती दिली.
या कार्यक्रमादरम्यान अनेक अत्याधुनिक विभागांचे लोकार्पण करण्यात आले. यामध्ये सुश्रुत शस्त्रक्रिया कक्ष संकुलाचा समावेश आहे, जिथे आयुर्वेदीय पद्धतीने शस्त्रक्रिया केल्या जातील. शारीरिक पुनर्वसनासाठी भौतिक उपचार विभाग, मुलांच्या सर्वांगीण आरोग्यासाठी कौमारभृत्य पंचकर्म विभाग आणि हाडांच्या आरोग्याच्या मूल्यांकनासाठी बीएमडी (Bone Mineral Density) विभाग सुरू करण्यात आला आहे. या नवीन विभागांमुळे पुराव्याधारित आयुर्वेद आणि समन्वित वैद्यकशास्त्राला मोठी चालना मिळणार आहे.
