युनिटी मॉलवरून मुख्यमंत्र्यांचे चिंबलकरांना आवाहन
पणजी : चिंबल येथील ‘युनिटी मॉल’ प्रकल्पावरून सुरू असलेल्या वादाच्या पार्श्वभूमीवर मुख्यमंत्री डॉ. प्रमोद सावंत यांनी ग्रामस्थांना चर्चेचे खुले निमंत्रण दिले आहे. विरोधकांच्या दिशाभूल करणाऱ्या अफवांना बळी न पडता ग्रामस्थांनी थेट माझ्याशी चर्चा करावी आणि प्रकल्पाला असलेला आपला विरोध नेमका कशासाठी आहे, हे स्पष्ट करावे, असे आवाहन मुख्यमंत्र्यांनी केले आहे.
प्रस्तावित प्रकल्पामुळे तोयार तलावाला धोका निर्माण होईल, ही भीती मुख्यमंत्र्यांनी फेटाळून लावली. ते म्हणाले, आमच्याच सरकारने या तलावाला ‘जैवविविधता स्थळ’ म्हणून अधिसूचित केले आहे. त्यामुळे त्याचे संरक्षण करण्याची संपूर्ण जबाबदारी सरकारचीच आहे. उलट मागील सरकारांनी या तलावाकडे जाणीवपूर्वक दुर्लक्ष केले होते.
मुख्यमंत्री पुढे म्हणाले की, हा प्रकल्प पूर्णपणे सरकारी जागेवर उभारला जात असून, या जमिनीचे संपादन दहा वर्षांपूर्वीच झाले होते. त्यावेळी कोणीही विरोध केला नव्हता. नगरनियोजन खात्यासह सर्व आवश्यक परवाने आणि बांधकाम परवाना मिळाल्यानंतरच कामाला सुरुवात झाली आहे. या मॉलसाठी लागणारा संपूर्ण निधी केंद्र सरकारने उपलब्ध करून दिला आहे.
या प्रकल्पाच्या स्वरूपाबद्दल माहिती देताना मुख्यमंत्र्यांनी स्पष्ट केले की, युनिटी मॉलमधील एक मजला स्थानिक विक्रेते, हस्तकला कारागीर आणि स्वयंसहायता गटांसाठी राखीव असेल. यामुळे स्थानिक उत्पादनांना मोठी बाजारपेठ मिळणार आहे.
| वैशिष्ट्य | तपशील |
| केंद्र सरकारचा निधी | प्रकल्पाचा संपूर्ण खर्च केंद्र सरकार उचलणार आहे. |
| स्थानिक आरक्षण | एक मजला स्वयंसहायता गट आणि कारागिरांसाठी राखीव. |
| प्रशासकीय संकुल | जीर्ण झालेल्या 'जुनता हाऊस'मधील कार्यालये येथे हलवली जाणार. |
| पर्यावरण रक्षण | तोयार तलाव जैवविविधता स्थळ म्हणून संरक्षित राहील. |
रविवारी विरोधकांनी चिंबल येथे घेतलेल्या सभेचा समाचार घेताना मुख्यमंत्री म्हणाले, विरोधक सत्तेत असताना विकास करू शकले नाहीत, आता कामे होत आहेत तर त्यांना पोटदुखी होत आहे. त्यांना विकासच नको असल्याने ते अडथळे निर्माण करत आहेत. विरोधकांचा विरोध सुरूच राहील, पण ग्रामस्थांनी आपले हित ओळखावे.
