एसपी अक्षत कौशल, संजीव आहुजा यांची राज्याबाहेर बदली
पणजी : केंद्रीय गृह मंत्रालयाने ‘अॅग्मुट’ कॅडरमधील भारतीय प्रशासकीय (आयएएस) आणि पोलीस सेवेतील (आयपीएस) अधिकाऱ्यांच्या बदल्यांचे आदेश जारी केले आहेत. या आदेशानुसार, गोव्याचे आयएएस अधिकारी मायकल डिसोझा, निखिल देसाई आणि आयपीएस अधिकारी शेखर प्रभुदेसाई यांची पुन्हा गोव्यात बदली करण्यात आली आहे. त्यामुळे राज्याच्या प्रशासनात पुन्हा एकदा जुन्या आणि अनुभवी चेहऱ्यांचे पुनरागमन झाले आहे.
मायकल डिसोझा यांना २०१५ मध्ये आयएएस म्हणून पदोन्नती मिळाली होती. गोव्यात त्यांनी दक्षता संचालक, ‘जीपार्ड’चे संचालक आणि अर्थ खात्याचे अतिरिक्त सचिव म्हणून काम पाहिले आहे. जून २०२३ मध्ये त्यांची लडाखला बदली झाली होती. आता सुमारे अडीच वर्षांनंतर ते पुन्हा गोव्यात रुजू होत आहेत.
२०१६ च्या बॅचचे अधिकारी असलेल्या निखिल देसाई यांची फेब्रुवारी २०२३ मध्ये दादरा आणि नगर हवेली येथे बदली झाली होती. ३४ महिन्यांच्या कालावधीनंतर ते पुन्हा गोव्यात परतत आहेत. गोव्याचे आयपीएस अधिकारी शेखर प्रभुदेसाई हे देखील जून २०२३ पासून अरुणाचल प्रदेशात कार्यरत होते. त्यांचीही अडीच वर्षांनी गोव्यात बदली झाली आहे.
या बदल्यांच्या सत्रात गोव्यात कार्यरत असलेल्या काही अधिकाऱ्यांच्या बदल्या बाहेर करण्यात आल्या आहेत, तर काही नवीन चेहरे गोव्यात येत आहेत. त्याचा तपशील खालीलप्रमाणे:
| अधिकारी | बदलीचे ठिकाण / तपशील |
|---|---|
| अक्षत कौशल (SP) | अरुणाचल प्रदेश |
| संजीव आहुजा (IAS) | दिल्ली |
| अंकिता मिश्रा (IAS) | अरुणाचल प्रदेश |
| श्रुती अरोरा (IPS) | लडाखवरून गोव्यात बदली |
