पेडणे पोलिसांनी केली दोघांना अटक : चित्रपटातून प्रेरणा घेऊन बनवली चोरी करण्याची वेगळी शैली
पणजी : गोव्यातील (Goa) पेडणे तालुक्यातील (Pernem Taluka) अनेक चोरीप्रकरणांत (Theft) पोलिसांनी (Police) अटक केलेल्या दोन मित्रांचे किस्से पुढे येऊ लागले आहेत. या दोघांनीही आर्थिक संस्था आणि राष्ट्रीयीकृत बॅंकांमधून चोरलेल्या सोन्यावर कर्ज घेऊन कपडे, बाईक, कार खरेदी केली. आणि ऑनलाइन गेमिंगवर पैसे खर्च केले. चित्रपटातून प्रेरणा घेऊन त्यांनी चोरी करण्याची वेगळी शैली तयार केली.
पेडणे पोलिसांनी मंगळवारी पेडणे येथील रहिवासी २९ वर्षीय रोहन पडवळ आणि कोलवाळ येथील रहिवासी २० वर्षीय जगन्नाथ उर्फ केतन बागकर यांना अटक केली. आणि त्यांच्याकडून ५३ लाख रुपये किमतीचे सोन्याचे दागिने आणि इतर चोरीचा माल जप्त केला. उपअधीक्षक (पेडणे) सलीम शेख यांनी सांगितले की, हे दोघे पेडणे तालुक्यातील ११ चोरीच्या प्रकरणांमध्ये सामील होते. चोरी केल्यानंतर दोघेही आर्थिक संस्था आणि बँकांमध्ये जाऊन चोरलेल्या सोन्यावर कर्ज घेत असत.
डिसेंबर, २०२४ पासून या दोघांनी पेडणे, धारगळ, विर्नोडा, तुये आणि कोरगाव परिसरात दिवसाढवळ्या घरफोड्या केल्या. आणि सोने व इतर ऐवज चोरला. चोरलेले सोने ते आर्थिक संस्थांना देत असत. आर्थिक संस्था चोरलेल्या सोन्यावर त्यांना ७०% मूल्य देत असत. प्रत्येक वेळी चोरी केल्यानंतर, ते बँकेत आणि आर्थिक संस्थेत जाऊन त्यांच्या कर्जाची रक्कम वाढवून घेत असत,” असे उपअधीक्षक शेख यांनी सांगितले. कधीही त्यांनी आधीचे कर्ज फेडले नाही, तरीही आर्थिक संस्था त्यांना नवीन चोरलेल्या सोन्यावर नवीन कर्ज देत होत्या.
चोरी केल्यानंतर हे दोघेही चोरीसाठी वापरलेल्या बाईकला रंगकाम करून पुर्वीचा रंग बदलत होते व छोट्या अक्षरांनी लिहिलेल्या बनावट नंबर प्लेट्स वापरत होते; अशी माहिती उपअधीक्षक शेख यांनी दिली. सीसीटीव्ही कॅमेऱ्यात नंबर टिपले जाऊ नयेत म्हणून ते ही खबरदारी घेत होते. बागकर आयटीआयमध्ये शिकत होता तर त्याचा मित्र सुट्टीच्या दिवशी चोरी करण्याचे नियोजन करीत होता. पकडले जाऊ नयेत म्हणून दोघेही कधीही बरोबर चोरी करण्यापूर्वी सर्वेक्षण करायला जात नव्हते. सकाळी १० ते दुपारी १ हा त्यांचा चोरी करण्याचा ठरलेला वेळ होता. एक मित्र घरात आत जायचा तर दुसरा कोणी येतोय का पहायला बाहेर थांबत होता.
दोघेही वेगवेगळ्या बाईकने एका ठरलेल्या जागी यायचे व नंतर एका बाईकने चोरी करण्यासाठी जायचे. चोरी केल्यानंतर दोघेही कपडे बदलून तेथून निसटायचे. चित्रपट पाहून त्यांना अशा प्रकारे चोरी करण्याची प्रेरणा मिळाल्याचे उपअधीक्षक शेख यांनी सांगितले.
