गुदमरून मृत्यू झाल्याचे निदान : संशयित रमेश तेली याला अटक
डिचोली : येथील बाजारात एका टेम्पोमध्ये आढळून आलेल्या माटणे-दोडामार्ग (महाराष्ट्र) येथील लक्ष्मी शिरोडकर या महिलेचा गुदमरून मृत्यू झाल्याचे निदान उत्तरीय तपासणीच्या अहवालात स्पष्ट झाले. यानंतर डिचोली पोलिसांनी हे प्रकरण खून म्हणून नोंद केले. याप्रकरणी तिच्यासोबतच राहणाऱ्या लाखेरे-बोर्डे, डिचोली येथील रमेश तेली याला अटक केली आहे.
शुक्रवार, दि. २६ डिसेंबर रोजी सकाळी डिचोली बाजारातून जुन्या पोलीस स्थानकाकडे जाणाऱ्या रस्त्याच्या बाजूला असलेल्या एका इमारतीच्या बाहेर पार्क करून ठेवलेल्या टेम्पोत महिलेचा मृतदेह आढळला होता. या प्रकरणाची माहिती डिचोली पोलिसांना दिल्यानंतर पोलीस निरीक्षक विजय राणे तसेच उपअधीक्षक बी. व्ही. श्रीदेवी यांनी पोलीस पथकासह घटनास्थळी धाव घेतली. मृतदेह उत्तरीय तपासणीसाठी बांबोळी येथील गोमेकॉत पाठवून दिला होता. सदर महिलेचा मृत्यू कशामुळे झाला हेच स्पष्ट नसले तरी या प्रकरणात घातपात असण्याची शक्यता व्यक्त करण्यात येत होती.
इमारतीच्या खाली सदर महिला व रमेश तेली हा राहत होता. लक्ष्मी शिरोडकर या दोडामार्ग येथील असून त्या डिचोली बाजारात राहत होत्या. तीन-चार दिवसांनी त्या आपल्या घरी जाऊन येत होत्या. त्यांना दोन मुली असून एका मुलीचे लग्न झाले तर दुसरी मुलगी खासगी आस्थापनात कामाला आहे. लक्ष्मी शिरोडकर व रमेश तेली यांच्यात अनेक वेळा वाद-विवाद व भांडणे व्हायची. यात ते एकमेकांना मारहाणही करायचे.
दि. २५ डिसेंबर रोजी रमेश तेली याने लक्ष्मी यांना मारहाण केली होती. त्या मारहाणीने जखमी झालेल्या लक्ष्मी यांना रमेश यांनी सदर टेम्पोमध्ये बसवले होते. तिथेच लक्ष्मीचा मृत्यू झाला होता. परंतु मृत्यू नेमका कशामुळे झाला हे स्पष्ट नसल्याने डिचोली पोलिसांनी याप्रकरणी कोणत्याही प्रकारचा गुन्हा नोंद केला नव्हता. संशयावरून रमेश तेली याला ताब्यात घेतले होते.
संशयिताकडून खुनाची कबुली
दि. २७ डिसेंबर रोजी लक्ष्मी शिरोडकर यांच्या मृतदेहाची बांबोळी येथील गोमेकॉ इस्पितळात चिकित्सा झाल्यानंतर त्यांचा मृत्यू गुदमरून झाल्याचे स्पष्ट झाले. यानंतर रमेश तेली याच्या विरोधात खुनाचा गुन्हा नोंद करण्यात आला. गुन्हा नोंदविल्यानंतर रमेश तेली याला डिचोली पोलिसांनी अटक केली. त्याला दि. २८ डिसेंबर रोजी न्यायालयासमोर हजर केले जाणार आहे. रमेश तेली याने खुनाची कबुली दिली आहे. पोलीस उपअधीक्षक श्रीदेवी यांच्या मार्गदर्शनाखाली निरीक्षक विजय राणे अधिक तपास करीत आहेत.
