आरोग्य केंद्राचे बनावट नाहरकत प्रमाणपत्र प्रकरण
म्हापसा : बर्च बाय रोमिओ लेन क्लबसाठी अबकारी खात्याचा (उत्पादन शुल्क) परवाना मिळवण्यासाठी कांदोळी आरोग्य केंद्राचे बनावट नाहरकत प्रमाणपत्र (एनओसी) वापरल्या प्रकरणी म्हापसा पोलिसांनी अटक केलेला रोमिओ लेनचा सहमालक अजय गुप्ता याला न्यायालयाने पाच दिवसांची पोलीस कोठडी सुनावली आहे. मंगळवारी संशयितांना हस्तांतरण रिमांडवर पोलिसांनी अटक केली होती.
कांदोळी प्राथमिक आरोग्य केंद्राचे अधिकारी डॉ. रोशन नाझारेथ यांनी या बनावटगिरी बाबत दि. १७ डिसेंबर रोजी पोलिसांत तक्रार दाखल केली आहे. हा फसवणूक व बनावटगिरीचा प्रकार १३ डिसेंबरपूर्वी अबकारी खात्याच्या म्हापसा निरीक्षक कार्यालयात घडला होता. बर्च दुर्घटना प्रकरणाच्या चौकशीवेळी संशयितांनी केलेला हा बनावटगिरीचा प्रकार उघडकीस आला होता.
साकवाडी हडफडे येथील सर्व्हे क्रमांक १५९/० मधील घर क्रमांक ५०२/१ मध्ये चालणाऱ्या जीएस हॉस्पिलिटी एलएलपी कंपनीच्या आस्थापनासाठी उत्पादन शुल्क परवाना मिळवण्याच्या उद्देशाने संशयित आरोपींनी समान हेतूने जाणूनबुजून आणि अप्रामाणिकपणे कांदोळी प्राथमिक आरोग्य केंद्राचे नाहरकत प्रमाणपत्र (एनओसी) तयार केले. यात संशयितांनी फिर्यादींची नक्कल करून बनावट सही केली व रजिस्टरमधील बनावट नोंदीचा वापर केला. नंतर हा बनावट दाखला खरा असल्याचे भासवून तो उत्पादन शुल्क खात्याकडे सादर केला. जेणेकरून उत्पादन शुल्क परवान्यासाठी कागदोपत्री व्यवहार पूर्ण करता येईल. संशयित आरोपी उत्पादन शुल्क परवाना मिळवण्यात यशस्वी झाले. फिर्यादी तसेच अबकारी अधिकाऱ्यांची यामुळे फसवणूक झाली.
तिघांविरुद्ध केला गुन्हा नोंद
पोलिसांनी याप्रकरणी वरील कंपनीसह कंपनीचे अधिकृत मालक असलेले सौरभ लुथरा, गौरव लुथरा व अजय गुप्ता यांच्याविरुद्ध भारतीय न्याय संहितेच्या ३३६(२), ३३६(३), ३३८, ३४०(२), ३१८(४) व ३(५) कलमान्वये गुन्हा नोंद केला आहे. पुढील तपास पोलीस निरीक्षक नवीन देसाई यांच्या मार्गदर्शनाखाली उपनिरीक्षक यशवंत मांद्रेकर हे करीत आहेत.
