मुळगावातील दुचाकीचालक जखमी
डिचोली : शिरोडवाडी मुळगाव डिचोली येथे हमरस्त्यावरून दुचाकीने जात असताना रस्ता ओलांडण्याच्या नादात बिबट्याने दुचाकीवर उडी टाकल्याने दिगंबर नाईक हा दुचाकीस्वार जखमी झाला. तसेच त्याच्या दुचाकीचे नुकसान झाले. रात्री आठ वाजण्याच्या दरम्यान ही घटना घडली.
बिबट्याच्या हल्यात मुळगाव येथील दिगंबर नाईक याच्या हाताला व पायाला जखम झाली. त्याच्यावर डिचोली आरोग्य केंद्रात प्राथमिक उपचार करून घरी पाठवण्यात आले.
मुळगाव परिसरात बिबट्याचा वावर सातत्याने वाढलेला असून काही दिवसांपूर्वी या ठिकाणी पिंजरा लावण्यात आला आहे. मात्र, बिबट्याचा वावर लोकवस्तीत सुरूच आहे. शनिवारी रात्री बिबट्या हमरस्ता ओलांडून जाताना दुचाकीला धडक दिल्याने दिगंबर नाईक जखमी झाला. बिबट्याची लोकांनी धास्ती घेतलेली असून सर्रासपणे हमरस्त्यावरून बिबटा रस्ता ओलांडून जात असल्याचे दिसत आहे.
