जमीन हडप, मनी लॉन्ड्रिंग प्रकरण : ईडीला एका आठवड्यात उत्तर देण्याचे निर्देश
पणजी : जमीन हडप प्रकरणातील मुख्य सूत्रधार रोहन हरमलकर याने गोवास्थित मुंबई उच्च न्यायालयात जामीन अर्ज दाखल केला आहे. या प्रकरणी न्यायालयाने सक्तवसुली संचालनालयाला (ईडी) एका आठवड्यात बाजू मांडण्यास सांगितले आहे. या प्रकरणाची पुढील सुनावणी ६ जानेवारी २०२६ रोजी ठेवली आहे.
म्हापसा पोलिसांनी २०२२ मध्ये हणजूण येथील सर्व्हे क्र. ४२६/५ मधील जमीन हडप केल्याप्रकरणी रोहन हरमलकर याच्या विरोधात गुन्हा दाखल केला होता. यानंतर जमीन हडप प्रकरणी विशेष तपास पथक (एसआयटी) स्थापन झाल्यानंतर हणजूण येथे सर्व्हे क्र. ४४४/८ मधील २,४५० चौ.मी. जमीन हडप प्रकरणी दुसरा गुन्हा दाखल केला. या दोन्ही गुन्ह्यांत मनी लाॅन्ड्रिंगचा संशय असल्याने सक्तवसुली संचालनालयाने (ईडी) कारवाई सुरू केली. ईडीने २४ आणि २५ एप्रिल रोजी रोहन याच्यासह त्याच्या इतर सहकाऱ्यांच्या पिळर्ण, पर्वरी, दिवाडी व इतर ठिकाणच्या घरांवर तसेच कार्यालयावर छापा टाकला. त्याच्याकडून १ हजार कोटींपेक्षा अधिक बाजारमूल्य असलेली हणजूण, हडफडे, आसगाव व इतर ठिकाणच्या जमिनीची, तसेच ६०० कोटींपेक्षा जास्त किमतीच्या स्थावर मालमत्तांची कागदपत्रे जप्त केली.
ईडीने रोहन हरमलकर आणि मोहम्मद सुहैल उर्फ मायकल याच्यासह अल्कांत्रो डिसोझा, स्टिव्हन डिसोझा आणि समीर सातार्डेकर यांच्याविरोधात सत्र न्यायालयात आरोपपत्र दाखल केले. याच दरम्यान हरमलकर याने पुन्हा न्यायालयात जामीन अर्ज दाखल केला. तो फेटाळल्यानंतर हरमलकर याने गोवास्थित मुंबई उच्च न्यायालयात जामीन अर्ज दाखल केला आहे. या प्रकरणी न्यायालयाने ईडीला एका आठवड्यात बाजू मांडण्यास सांगितले आहे. या प्रकरणाची पुढील सुनावणी ६ जानेवारी २०२६ रोजी ठेवली आहे.
सत्र न्यायालयानेही फेटाळला होता अर्ज
ईडीने हरमलकरला ३ जून २०२५ रोजी अटक केली. या प्रकरणी हरमलकर याने मेरशी येथील उत्तर गोवा जिल्हा व सत्र न्यायालयात दाखल केलेला जामीन अर्ज फेटाळून लावण्यात आला. याच दरम्यान ईडीने हरमलकर याने अल्कांत्रो डिसोझा व इतरांसह षड्यंत्र रचून मिळवलेली २१२.८५ कोटी रुपयांची मालमत्ता तात्पुरती जप्त केली. त्यात हणजूण, रेवोडा, नादोडा, कामुर्ली, पर्रा आणि बार्देश तालुक्यातील इतर मालमत्तांचा समावेश आहे.
