गोवा वेल्हा येथील अपघातात पत्नीने गमावला होता जीव
पणजी : गोवा वेल्हा येथील पेट्रोल पंपाजवळ सोमवार, ३ नोव्हेंबर रोजी सकाळी यामाहा मोटारसायकल आणि हिरो होंडा अॅक्टिव्हामध्ये अपघात झाला होता. अपघातात जखमी झालेल्या नेवरा येथील दुचाकी चालक साजू नाईक (७८) यांचे उपचारादरम्यान गोमेकाॅत निधन झाले आहे. दरम्यान, याच अपघातात जखमी झालेले साजू नाईक यांची पत्नी संगीता नाईक (७१) हिचे ५ नोव्हेंबर रोजी निधन झाले होते. या प्रकरणी आगशी पोलिसांनी यामाहा मोटार सायकल चालक मोहम्मद झैद शेख (२१, आगशी) याच्यावर गुन्हा दाखल करुन कारवाई केली होती.
सोमवार दि. ३ नोव्हेंबर रोजी सकाळी ११.३५ वाजता गोवा वेल्हा येथील इंडियन आॅईल पेट्रो पंपजवळ यामाहा मोटारसायकल आणि अॅक्टिव्हामध्ये अपघात झाला. दोन्ही वाहने शिरदोनहून गोवा वेल्हाच्या दिशेने जात होती. त्यावेळी पेट्रोल पंपच्या समोर पोहचताच अॅक्टिव्हा दुचाकी चालक साजू नाईक (७८, नेवरा) यांच्या दुचाकीत पेट्रोल भरण्याचे असल्याने वळण घेतले होते. त्याचवेळी त्यांच्या मागाहून येणाऱ्या यामाहा मोटारसायकल चालक मोहम्मद झैद शेख याने आपली दिशा सोडून वळण घेणाऱ्या दुचाकीला जोरदार धडक दिली होती. त्यात दुचाकी चालक साजू नाईक आणि दुचाकीवर मागे बसलेली त्यांची पत्नी संगीता नाईक (७१) दोघे गंभीर जखमी झाले होते. त्या दोघांसह यामाहा चालक मोहम्मद झैद शेख याला बांबोळी येथील गोवा वैद्यकीय महाविद्यालय इस्पितळात दाखल करण्यात आले. त्यानंतर प्राथमिक उपचार करून शेख याला घरी पाठविण्यात आले. तर, दुचाकीवर मागे बसलेल्या संगीता नाईक यांचे ५ नोव्हेंबर रोजी उपचारादरम्यान निधन झाले. तर दुचाकी चालक साजू नाईक याच्यावर गोमेकाॅत उपचार सुरू होते. दरम्यान त्यांचाही मृत्यू झाला आहे.
या प्रकरणी आगशी पोलीस स्थानकाचे निरीक्षक अनंत गावकर यांच्या मार्गदर्शनाखाली हवालदार विनित कुर्टीकर यांनी अपघाताचा पंचनामा केला होता. अपघातात संगीता नाईक हिचा मृत्यू झाल्याचे समोर आल्यानंतर पोलिसांनी मोहम्मद झैद शेख याच्याविरोधात गुन्हा दाखल करून अटक केली होती.
