२०२५ मधील नीचांकी तापमानाची नोंद
पणजी: मागील काही दिवसांपासून राज्यात थंडीची तीव्रता लक्षणीयरीत्या वाढली आहे. ग्रामीण भागात थंडीचा कडाका अधिक जाणवत आहे. शुक्रवारी पणजीमध्ये २०२५ मधील सर्वांत नीचांकी म्हणजेच किमान १७.५ अंश सेल्सिअस तापमानाची नोंद झाली, तर मुरगावमधील किमान तापमान १८.६ अंश सेल्सिअस राहिले.
हवामानाचा एकंदरीत अंदाज
पुढील सहा दिवस राज्यातील किमान तापमान १९ ते २० अंश सेल्सिअसपर्यंत पोहोचण्याची शक्यता आहे. यादरम्यान पहाटे मध्यम स्वरूपाचे धुके पडण्याची शक्यता आहे. सध्या राज्यात रात्री आणि पहाटे तीव्र थंडी जाणवत आहे. पहाटे अनेक ठिकाणी धुके पडत असून, सकाळच्या वेळी थंडीसह गार वाऱ्याची झुळूक अनुभवायला मिळत आहे. असे असले तरी दुपारनंतर उन्हाची तीव्रता वाढत आहे. शुक्रवारी पणजी आणि मुरगावमध्ये देखील ३३.८ अंश सेल्सिअस कमाल तापमानाची नोंद झाली. पुढील सहा दिवस राज्यातील कमाल तापमान ३३ ते ३४ अंश सेल्सिअस दरम्यान राहण्याची शक्यता आहे.
तापमानाचा मागील विक्रम:
राज्यात डिसेंबर महिन्यातील किमान तापमान साधारणपणे २१ ते २२ अंशांदरम्यान असते. मागील चार दिवसांत किमान तापमान सरासरीपेक्षा १.५ ते ३.५ अंशांनी कमी होत आहे. याआधी १२ डिसेंबर १९६५ रोजी पणजीत १५.१ अंश सेल्सिअस तापमानाची नोंद झाली होती. २४ डिसेंबर २०१६ रोजी १७.६ अंश, तर १९ डिसेंबर २०२१ रोजी १८.४ अंश सेल्सिअस तापमानाची नोंद झाली होती. याआधी हवामान खात्याने डिसेंबर महिन्यात राज्यातील किमान तापमान सरासरीपेक्षा कमी राहण्याची शक्यता व्यक्त केली होती.
ग्रामीण भागात थंडी अधिक
राज्यातील ग्रामीण भागात थंडीची तीव्रता अधिक जाणवत आहे. खाजगी हवामान केंद्राच्या माहितीनुसार, शुक्रवारी सुर्ला येथे पारा १२ अंश सेल्सिअसपर्यंत खाली उतरला होता, तर काणकोण येथे १६ अंश सेल्सिअस तापमानाची नोंद झाली.
