पणजी : २३ वर्षांखालील महिलांच्या टी-२० करंडक एलिट क्रिकेट स्पर्धेत शनिवारी गोव्याने जम्मू व काश्मीर संघाचा १४ धावांनी पराभव केला. गोवा संघाने प्रथम फलंदाजी करताना २० षटकांत पाच गडी गमावून १२४ धावा केल्या. जम्मू-काश्मीरला ९ गडी गमावून केवळ ११० धावांपर्यंत मजल मारणे शक्य झाले. नागपूर येथील लेडी अमृतबाई डागा कॉलेज मैदानावर हा सामना खेळवण्यात आला.
गोवा संघातर्फे अथश्री शिवरकर हिने २८ चेंडून चार चौकारांसह सर्वाधिक नाबाद ३२ धावा केल्या. सलामीवीर हर्षिता यादव व यष्टिरक्षक फलंदाज तनिषा गायकवाड यांनी प्रत्येकी २० धावा केल्या. उस्मा खान व कर्णधार तनया नाईक यांनी प्रत्येकी १९ धावांचे योगदान दिले. जम्मू-काश्मीरकडून मरिया नुरेन व अनन्या शर्मा यांनी प्रत्येकी दोन व रिधिमा राजपूत हिने एक गडी बाद केला. लक्ष्याचा पाठलाग करताना, जम्मू-काश्मीरने ठराविक अंतराने गडी गमावले. त्यांच्या शांभवी राजपूतने सर्वाधिक ३८ धावांचे योगदान दिले. गोव्यातर्फे उस्मा खानने १९ धावात दोन, तनया नाईकने २९ धावांत दोन गडी बाद केले. हर्षिता यादवने ८ धावा देत, मेताली गवंडरने १० धावांत एक तर पूजा कालेलने १९ धावांत एक गडी बाद केला. या विजयानंतर गोव्याचा संघ चार सामन्यांतून दोन विजय व दोन पराभवांसह एलिट ड गटात चौथ्या स्थानी आहे. गोवा आपला शेवटचा गट सामना १ डिसेंबर रोजी हैदराबादशी खेळणार आहे.
