प्रभू श्रीरामांची जगातील सर्वात मोठी मूर्ती पर्तगाळी मठात स्थापित
पणजी: गोवा आज शुक्रवारी एका ऐतिहासिक क्षणाचा साक्षीदार होणार आहे. पंतप्रधान नरेंद्र मोदी यांच्या हस्ते दक्षिण गोव्यातील काणकोण येथील श्री संस्थान गोकर्ण जीवोत्तम मठात भगवान श्रीरामाच्या ७७ फूट उंच भव्य कांस्य मूर्तीचे अनावरण करण्यात येणार आहे. मठाच्या ५५० व्या वर्धापन दिनानिमित्त 'सार्ध पंचशतमहोत्सव' होत असून, यामुळे गोव्यातील आध्यात्मिक पर्यटनाला मोठी चालना मिळणार आहे. पंतप्रधानांच्या दौऱ्याच्या पार्श्वभूमीवर पर्तगाळी मठ आणि परिसरात कडेकोट सुरक्षा व्यवस्था तैनात करण्यात आली असून, वाहतूक विभागाने विशेष मार्गदर्शिकाही जारी केली आहे.
पंतप्रधानांचा गोव्यातील कार्यक्रम
पंतप्रधान मोदी आज दुपारी ३:१५ वाजता दक्षिण गोव्यातील काणकोण येथील श्री संस्थान गोकर्ण पर्तगाळी जीवोत्तम मठात पोहोचतील. या मठाच्या ५५० वर्षांच्या जुन्या आध्यात्मिक वारशाला नवी ओळख देण्यासाठी मठाचे पूर्णपणे नूतनीकरण करून त्याला आधुनिक स्वरूप देण्यात आले आहे. यावेळी पंतप्रधान ७७ फूट उंच कांस्य निर्मित प्रभू श्रीरामाच्या मूर्तीचे अनावरण करतील. यानंतर ते मठ प्रशासनाने विकसित केलेल्या 'रामायण थीम पार्क गार्डन' चेही उद्घाटन करतील.
या कार्यक्रमादरम्यान पंतप्रधान एक विशेष स्मारक टपाल तिकीट आणि एक खास नाणे जारी करतील आणि उपस्थित हजारो भाविकांना संबोधित करतील. यावेळी गोव्याचे राज्यपाल पुसापती अशोक गजपती राजू, मुख्यमंत्री डॉ. प्रमोद सावंत, केंद्रीय मंत्री श्रीपाद नाईक आणि अनेक कॅबिनेट मंत्री तसेच समाजातील अनेक मान्यवर उपस्थित राहतील.
पर्तगाळी येथील श्रीराम मूर्तीची ५ वैशिष्ट्ये
जगात भगवान रामाची एवढी मोठी मूर्ती पहिल्यांदाच एखाद्या मठाच्या परिसरात स्थापित होत असल्याचे मानले जाते. या मूर्तीची ५ मुख्य वैशिष्ट्ये खालीलप्रमाणे आहेत:
१. सर्वात मोठी उंची: ७७ फुटांची ही राम मूर्ती सध्या जगातील भगवान रामाची सर्वात उंच मूर्ती मानली जाते.
२. धातू आणि कला: ही मूर्ती कांस्य धातूपासून बनवलेली आहे.
३. शिल्पकार: विशेष म्हणजे, गुजरातमध्ये 'स्टॅच्यू ऑफ युनिटी' बनवणारे प्रसिद्ध शिल्पकार राम सुतार यांनीच या मूर्तीची रचना केली आहे. यामुळे ही मूर्ती भारतीय कला आणि अभियांत्रिकीचा अनोखा नमुना ठरली आहे.
४. प्रतीकात्मक संदेश: दोन दिवसांपूर्वी (२५ नोव्हेंबर) पंतप्रधान मोदींनी अयोध्येतील राम मंदिरावर धर्म ध्वज फडकवला होता आणि त्यानंतर लगेच गोव्यात या भव्य मूर्तीचे अनावरण होणे हा देशाच्या सांस्कृतिक आणि आध्यात्मिक पुनरुत्थानाचा महत्त्वाचा प्रतीकात्मक संदेश मानला जात आहे.
५. उत्सव: २७ नोव्हेंबर ते ७ डिसेंबरपर्यंत मठ परिसरात दररोज विशेष धार्मिक आणि सांस्कृतिक कार्यक्रमांचे आयोजन केले जाणार आहे.
उडुपी येथील कार्यक्रम
गोव्याला येण्यापूर्वी पंतप्रधान मोदी सकाळी ११:३० वाजता कर्नाटकच्या उडुपी येथील श्री कृष्ण मठात लक्ष कंठ गीता पारायण कार्यक्रमात सहभागी होतील. हा एक भक्तिमय सोहळा असून, यात सुमारे एक लाख लोक, विद्यार्थी, साधू, विद्वान आणि भक्त एकत्रितपणे श्रीमद्भगवद् गीतेचे पठण करतील. यानंतर उडुपी येथे पंतप्रधान सुवर्ण तीर्थ मंडपाचे उद्घाटन करतील आणि पवित्र कनकना किंडी साठी तयार केलेला सुवर्ण कवच समर्पित करतील.
आध्यात्मिक पर्यटनाला चालना
गोव्यातील पर्तगाळी मठाला ५५० वर्षे पूर्ण होत असल्याने राज्यात शेकडो वर्षांपासून आध्यात्मिक परंपरा अविरत सुरू असल्याचे सिद्ध होते, असे मत मुख्यमंत्री डॉ. प्रमोद सावंत यांनी व्यक्त केले. उत्तर गोव्यात भगवान परशुरामाचा पुतळा उभारल्यानंतर आता दक्षिण गोव्यात ७७ फूट उंच श्रीरामाची मूर्ती उभी राहिल्यामुळे राज्यात आध्यात्मिक पर्यटनाला मोठी गती मिळणार आहे.
