सांगली : आपले वैयक्तिक आयुष्य नेहमीच प्रसिद्धीपासून दूर ठेवणारी स्मृती मानधना गेल्या काही दिवसांपासून तिच्या हळदी, मेहंदीसह प्री-वेडिंग सेलिब्रेशनचे फोटो आणि व्हिडिओ इंस्टाग्रामवर शेअर करत होती. मात्र, लग्नाचा सोहळा पुढे ढकलल्यानंतर तिने तिच्या सोशल मीडिया अकाउंटवरून सर्व फोटो आणि व्हिडिओ डिलीट केले आहेत.
भारतीय महिला क्रिकेट संघाची स्टार फलंदाज स्मृती मानधना आणि प्रसिद्ध गायक पलाश मुच्छल यांचा विवाह सोहळा तूर्तास अनिश्चित काळासाठी पुढे ढकलण्यात आला आहे. लग्नाच्या पूर्वसंध्येला स्मृतीच्या वडिलांना हृदयविकाराचा सौम्य झटका आल्याने त्यांना रुग्णालयात दाखल करावे लागले होते, ज्यामुळे हा महत्त्वपूर्ण निर्णय घेण्यात आला. दरम्यान, या घटनेनंतर स्मृतीने तिच्या सोशल मीडिया अकाउंटवरून हळदी, मेहंदीसह लग्नाच्या सोहळ्याचे सर्व फोटो आणि व्हिडीओ डिलीट केले आहेत.
स्मृतीच्या वडिलांना रुग्णालयात दाखल केल्यानंतर दुसऱ्याच दिवशी नवरदेव पलाश मुच्छल याचीही प्रकृती अचानक बिघडल्याने त्याला सांगली येथील रुग्णालयात दाखल करण्यात आले होते. पलाशची आई अमिता मुच्छल यांनी दिलेल्या माहितीनुसार, पलाशला उपचारासाठी मुंबईत आणण्यात आले असून, त्याची प्रकृती आता स्थिर आहे आणि तो घरी विश्रांती घेत आहे.
पलाशची बहीण आणि गायिका पलक मुच्छल हिने सोशल मीडियावर भावनिक पोस्ट शेअर केली. स्मृतीच्या वडिलांच्या आरोग्याच्या कारणामुळे पलाश आणि स्मृतीचे लग्न थांबवण्यात आले आहे. या कठीण काळात कुटुंबाच्या खासगीपणाचा मान राखण्याची आम्ही सर्वांना विनंती करतो, असे तिने म्हटले आहे.
चाहत्यांना बसेना विश्वास
या व्हिडिओमध्ये स्मृती मानधना टीममधील खेळाडू जेमिमा रोड्रिग्स, श्रेयंका पाटील आणि राधा यादव दिसल्या होत्या. स्मृतीने लग्नाच्या सर्व आठवणी डिलिट केल्याने चाहते हैराण झाले आहेत. स्मृतीने पोस्ट डिलिट केले की हाइड हे अद्याप कळू शकलेलं नाही. दुसरीकडे पलाश मुच्छलने २१ नोव्हेंबर रोजी नवी मुंबईच्या डी व्हाय पाटील स्टेडियममध्ये स्मृतीला प्रपोज करण्याचा व्हिडिओ शेअर केला होता, तो अद्याप अकाऊंटवर दिसत आहे.
