अंतिम सामन्यात जपानच्या युशी तनाकावर एकतर्फी मात
सिडनी : भारतीय शटलर लक्ष्य सेनने रविवारी ऑस्ट्रेलियन ओपन सुपर ५०० बॅडमिंटन स्पर्धेचे विजेतेपद पटकावले. अंतिम सामन्यात त्याने जपानच्या युशी तनाकाचा २१-१५, २१-११ असा सरळ गेममध्ये पराभव केला. सिडनी स्पोर्ट्स सेंटरमध्ये अवघ्या ३८ मिनिटांत लक्ष्यने हा सामना जिंकला आणि विजयानंतर त्याने आपल्या खास शैलीत, कानांत बोटे धरून आनंद साजरा केला.
उत्तराखंडमधील अल्मोडा येथील रहिवासी असलेल्या २४ वर्षीय लक्ष्य सेनला पॅरिस ऑलिंपिकमध्ये चौथ्या स्थानावर राहिल्यानंतर खराब फॉर्मचा सामना करावा लागला होता. मात्र, या स्पर्धेत त्याने उपांत्य फेरीत चायनीज तैपेईच्या चाउ तिएन चेनला हरवून आणि अंतिम फेरीत तनाकाला नमवून शानदार पुनरागमन केले.
तनाका विरुद्ध एकतर्फी वर्चस्व
यावर्षी ऑर्लीन्स मास्टर्स आणि यूएस ओपन (दोन्ही सुपर ३००) जिंकणाऱ्या जागतिक क्रमवारीत २६ व्या स्थानावर असलेल्या तनाकाविरुद्ध लक्ष्य सेनने उत्कृष्ट नियंत्रण आणि अचूकता दाखवली. लक्ष्यने सुरुवातीपासूनच सामन्यावर पकड मिळवली आणि ६-३ अशी आघाडी घेतली. तनाका नेट, बॅकलाइन आणि ओव्हरहिट शॉट्समध्ये चुका करत राहिला. ब्रेकपर्यंत लक्ष्य ११-८ अशा आघाडीवर होता. ब्रेकनंतर लक्ष्यने आपला बॅकहँड स्मॅश आणि क्रॉस-कोर्ट विनरच्या जोरावर १७-१३ अशी आघाडी घेतली आणि पहिली संधी साधत गेम जिंकला.
दुसरा गेम पूर्णपणे एकतर्फी झाला. लक्ष्यने सुरुवातीलाच ८-४ अशी मोठी आघाडी घेतली. त्याचे बॅकलाइन जजमेंट अचूक होते, तर तनाका शटल बाहेर मारत राहिला. लक्ष्यने निर्णायक रॅली जिंकून १९-८ अशी आघाडी मिळवली. त्याने मिळालेल्या मॅच पॉइंट्सपैकी दुसऱ्या पॉइंटवर शक्तिशाली क्रॉस-कोर्ट शॉट मारून सामना आणि जेतेपद आपल्या नावावर केले.
........
२०२४ नंतरचे पहिले ‘सुपर ५००’ विजेतेपद
जागतिक क्रमवारीत १४ व्या स्थानावर असलेल्या लक्ष्य सेनने यापूर्वी २०२४ मध्ये लखनौ येथे सय्यद मोदी इंटरनॅशनल (सुपर ३००) जिंकले होते. त्यानंतर हे त्याचे पहिलेच मोठे सुपर ५०० विजेतेपद आहे. या विजयासह, लक्ष्य या हंगामात बीडब्ल्यूएफ वर्ल्ड टूर जेतेपद जिंकणारा दुसरा भारतीय ठरला आहे. यापूर्वी आयुष शेट्टीने यूएस ओपन सुपर ३०० जिंकले होते.
