पोलिसांनी जेनिटोच्या जामीन अर्जावर बाजू मांडण्यास मागितला वेळ
पणजी : सामाजिक कार्यकर्ते रामा काणकोणकर यांच्यावर प्राणघातक हल्ला प्रकरणातील महत्त्वाचा फॉरेन्सिक अहवाल आणि काणकोणकर यांच्या जात प्रमाणपत्राची पडताळणी अद्याप प्रलंबित आहे. त्यामुळे पोलिसांनी जेनिटो कार्दोझ याच्या जामीन अर्जावर बाजू मांडण्यास न्यायालयाकडे वेळ मागितला. याची दखल घेऊन मेरशी येथील उत्तर गोवा जिल्हा व सत्र न्यायालयाने पुढील सुनावणी २६ नोव्हेंबर रोजी ठेवली.
करंझाळे येथे १८ सप्टेंबर रोजी रामा काणकोणकर यांच्यावर प्राणघातक हल्ला करण्यात आला होता. या प्रकरणी पणजी पोलिसांनी मुख्य सूत्रधार जेनिटो कार्दोझ याच्यासह अँथनी नदार, फ्रान्सिस नदार, मिंगेल आरावजो, मनीष हडफडकर, सुरेश नाईक, फ्रांको डिकॉस्टा व साईराज गोवेकर या आठ जणांना अटक केली होती.
रामा काणकोणकर यांनी जबाबात मिंगेल आरावजो हा आपला पाठलाग करत होता. मारहाण करताना हल्लेखोरांनी आपल्याला ‘गावडा’ आणि ‘राखणदार’ म्हणून हिणवण्याचा प्रयत्न केला’, असे सांगितले होते. याची दखल घेऊन पोलिसांनी या गुन्ह्यात अनुसूचित जाती आणि अनुसूचित जमाती (छळ प्रतिबंध) कायद्याअंतर्गत कलम जोडून हे प्रकरण पोलीस उपअधीक्षक सुदेश नाईक यांच्याकडे चौकशीसाठी सोपवले होते. याच दरम्यान सराईत गुंड जेनिटो कार्दोझ याने न्यायालयात जामीन अर्ज दाखल केला होता. तो न्यायालयाने फेटाळून लावला होता.
वैयक्तिक द्वेष आणि ऑनलाईन थट्टेमुळे कट रचून मुख्य सूत्रधार जेनिटो कार्दोझ याच्या इशाऱ्यावरून समाज कार्यकर्ते रामा काणकोणकर यांच्यावर प्राणघातक हल्ला करण्यात आला, असा दावा पोलिसांनी केला. तसेच जेनिटोसह इतर सात जणांच्या विरोधात मेरशी येथील उत्तर गोवा जिल्हा व सत्र न्यायालयात १,३७१ पानी आरोपपत्र दाखल करण्यात आले असून, यात ४९ जणांची साक्ष नमूद केली. याच दरम्यान जेनिटो याने न्यायालयात पुन्हा जामीन अर्ज दाखल केला. या प्रकरणी शुक्रवारी न्यायालयात जामीन अर्जावर सुनावणी झाली असता, पोलिसांनी वरील माहिती देत बाजू मांडण्यासाठी वेळ मागितला.
