पणजी : बार्देश येथील हणजूण जमीन हडप प्रकरणी तपास करणाऱ्या विशेष पथकाने (एसआयटी) मुख्य सूत्रधार मोहम्मद सुहैल उर्फ मायकल फर्नांडिस याला अटक केली आहे. सुहैल याला जमीन हडप प्रकरणात एसआयटीने एकोणीस वेळा अटक केली आहे.
या प्रकरणी एलिटेरियो अँथनी कार्वाल्हो यांनी तक्रार दाखल केली. त्यानुसार, त्याच्या पूर्वजांची आसगाव येथील सर्व्हे क्रमांक ४४/२ येथील २,४५० चौ. मीटर जमीन आहे. ही जमीन संशयित ब्रांका दिनिज, पावलिना दिनिज, मारियानो गोन्साल्विस आणि राॅयसन रॉड्रिग्ज, मोहम्मद सुहैल उर्फ मायकल फर्नांडिस, राजकुमार मैथी, डॅनवर डिसोझा आणि इतरांनी हडप केल्याचे म्हटले होते. याची दखल घेऊन तत्कालीन एसआयटीचे निरीक्षक सूरज सामंत यांनी वरील संशयितांविरोधात गुन्हा दाखल केला होता. त्यानंतर २०२४ मध्ये संशयित राॅयसन रॉड्रिग्ज या संशयिताला एसआयटीने अटक करून कारवाई केली. दरम्यान, या प्रकरणाचा तपास उपनिरीक्षक सनीत कवळेकर याच्याकडे वर्ग करण्यात आला. त्यानंतर एसआयटीने मुख्य सूत्रधार मोहम्मद सुहैल उर्फ मायकल फर्नांडिस याला अटक केली आहे. आतापर्यंत सुहैलला जमीन हडप प्रकरणी एसआयटीने एकोणीस वेळी अटक केली आहे. दरम्यान, सुहैलला म्हापसा येथील प्रथमवर्ग न्यायालयात हजर केले असता, न्यायालयाने सुहैलला १४ दिवस न्यायालयीने कोठडी ठोठावली आहे.
