मिर्झापूर येथील जमीन वादातून गब्बरचा खून प्रकरण
पणजी : मिर्झापूर (उत्तर प्रदेश) येथील जमिनीच्या वादातून चंद्रिका उर्फ गब्बर साहनी (३२, रा. उत्तर प्रदेश) याचा २०२३ मध्ये खून करण्यात आला होता. या प्रकरणातील संशयित व गब्बरचा चुलतभाऊ रणजीत प्रसाद याचा सहा आठवड्यांसाठी तात्पुरता जामीन अर्ज न्यायालयाने फेटाळला आहे. संशयिताकडून साक्षीदारांवर दबाब टाकणे शक्य असल्याचे निरीक्षण नोंदवून हा जामीन फेटाळला.
मेरशी येथील अतिरिक्त सत्र न्यायाधीश क्षमा जोशी यांनी हा आदेश दिला.
जुने गोवा पोलिसांना २७ ऑगस्ट २०२३ रोजी सायंकाळी दांडो-करमळी येथील मानशीत हातपाय बांधलेल्या अवस्थेत अज्ञात व्यक्तीचा मृतदेह सापडला होता. पर्वरी पोलीस स्थानकात २३ ऑगस्ट २०२३ रोजी चंद्रिका उर्फ गब्बर सहानी बेपत्ता असल्याचे माहिती समोर आली होती. त्यानुसार, पोलिसांनी संबंधित तक्रारदाराला मृतदेहाची ओळख पटवण्यासाठी बोलावले असता, त्याने मृतदेह गब्बरचा असल्याचा सांगितले. तसेच काही महिन्यांपूर्वी गब्बरची मिर्झापूर (उत्तर प्रदेश) येथे जमिनीच्या वादावरून चुलत भावंडासोबत भांडण झाल्याची माहिती दिली. त्यानुसार, पोलिसांनी त्याचे चुलत भाऊ राजेंद्र प्रसाद, रणजीत प्रसाद, राजकुमार प्रसाद या तिघांची चौकशी केली असता, त्यांनी गब्बरला मारहाण करून गवंडाळी पुलावरून पाण्यात फेकून दिल्याची कबुली दिली. पोलिसांनी गब्बरच्या खून प्रकरणी गुन्हा दाखल करून राजेंद्र प्रसाद, रणजीत प्रसाद, राजकुमार प्रसाद याच्यासह अखिलेश कुमार साहनी या चौघांना अटक केली. या प्रकरणी पोलिसांनी न्यायालयात संशयिताविरोधात आरोपपत्र दाखल केल्यानंतर न्यायालयाने आरोप निश्चित करून खटला सुरू केला. याच दरम्यान रणजीत प्रसाद याने मेरशी येथील उत्तर गोवा जिल्हा व सत्र न्यायालयात जामीन अर्ज दाखल केला. त्यात त्याने त्याचा वडिलांला कर्करोग झाला असून ते अंथरुणाला खिळल्याचे सांगितले. त्यामुळे त्याला सहा आठवड्यांचा तात्पुरता जामीन देण्याची मागणी केली. या संदर्भात न्यायालयात सुनावणी झाली असता, सरकारी अभियोक्ता शिवराम पाटील यांनी युक्तिवाद मांडून संशयित रणजीत याने कार तसेच ड्रिल मशिन त्याच्या मित्रांकडून आणले होते. तसेच साक्षीदार संशयित रणजीत याचे मित्र आणि कर्मचारी असून त्यांच्यावर तो दबाव टाकण्याची शक्यता आहे. या प्रकरणी न्यायालयाने दोन्ही बाजू एेकून घेतल्यानंतर वरील निरीक्षण नोंदवून सहा आठवड्याचा तात्पुरता जामीन फेटाळून लावला.
