न्यायालयीन कोठडीत १३ नोव्हेंबरपर्यंत वाढ
प्रतिनिधी। गोवन वार्ता
पणजी : समाज कार्यकर्ते रामा काणकोणकर यांच्यावर प्राणघातक हल्ला प्रकरणातील मुख्य सूत्रधार जेनिटो कार्दोझ आणि इतर सात जणांच्या कोठडीत मेरशी येथील उत्तर गोवा जिल्हा व सत्र न्यायालयाने वाढ केली आहे. जेनिटोसह आठही संशयितांना १३ नोव्हेंबरपर्यंत न्यायालयीन कोठडीत ठेवण्याचा आदेश अतिरिक्त सत्र न्यायाधीश विजया आंब्रे यांनी दिला.
रामा काणकोणकर यांच्यावर करंझाळे येथे १८ सप्टेंबर रोजी प्राणघातक हल्ला झाला होता. या प्रकरणात पोलिसांनी सराईत गुंड जेनिटो कार्दोझ याच्यासह अँथनी नदार, फ्रान्सिस नदार, मिंगेल आरावजो, मनीष हडफडकर, सुरेश नाईक, फ्रांको डिकॉस्टा व साईराज गोवेकर या आठ जणांना अटक केली होती. संशयितांना न्यायालयाने प्रथम पोलीस कोठडी ठोठावली. ती संपल्यानंतर आठही संशयितांची न्यायालयीन कोठडीत रवानगी केली. न्यायालयीन कोठडी संपल्यानंतर शुक्रवारी आठही संशयितांना न्यायालयात हजर करण्यात आले. त्यावेळी न्यायालयाने त्यांना पुन्हा न्यायालयीन कोठडीत ठेवण्याचा आदेश देत १३ नोव्हेंबर रोजी हजर करण्याचा निर्देश दिला.
रामा काणकोणकर यांनी जबाबात ‘मिंगेल आरावजो हा आपला पाठलाग करत होता. मारहाण करताना हल्लेखोरांनी आपल्याला ‘गावडा’ आणि ‘राखणदार’ म्हणून हिणवण्याचा प्रयत्न केला’, असे सांगितले होते. याची दखल घेऊन पोलिसांनी या गुन्ह्यात अनुसूचित जाती आणि अनुसूचित जमाती (छळ प्रतिबंध) कायद्याअंतर्गत कलम जोडून हे प्रकरण पोलीस उपअधीक्षक सुदेश नाईक यांच्याकडे चौकशीसाठी सोपवले होते. याच दरम्यान सराईत गुंड जेनिटो कार्दोझ याने न्यायालयात जामीन अर्ज दाखल केला होता. तो न्यायालयाने फेटाळून लावला होता.
