मडगाव गँगवॉरप्रकरणी आणखी दोघा संशयितांना अटक

मडगाव : मुंगूल येथील गँगवॉरप्रकरणी फातोर्डा पोलिसांनी राजस्थान येथून संशयित ओमसा याला व बोरी येथील सूरज नाईक बोरकर याला अटक केली आहे. संशयितांना न्यायालयाने सात दिवस कोठडी सुनावली असून एकूण संशयिताची संख्या २३ झालेली आहे. यात अजूनही काहीजणांची अटक होण्याची शक्यता आहे.
मुंगूल माडेल येथील शगुन हॉटेलनजीक १२ ऑगस्ट रोजी गाडी अडवून तलवार, कोयता, सोडा बॉटल्सचा वापर करत संशयितांनी गोळीबारही केला होता. हे गँगवॉर असल्याचे आता पोलिसांनी स्पष्ट केले आहे. यात रफीक ताशान (२४) व युवकेश सिंग बदैला (२०) हे गंभीर जखमी झाले होते. दक्षिण गोवा पोल‍ीस अधीक्षक टिकमसिंग वर्मा यांच्या नेतृत्वाखाली विविध पथके तयार करत गँगवॉरमध्ये सहभागी संशयितांना अटक करण्यात येत आहे.
दक्षिण गोव्यासह उत्तर गोव्यातूनही संशयितांना अटक करण्यात आलेली आहे. आतापर्यंत संशयित विल्सन कार्व्हालो, शाहरुख शेख (रा. दवर्ली), रसूल शेख (रा. मडगाव), मोहम्मद अली (२४), वासू कुमार (२४), सूरज माझी (१९), मलिक शेख (१८), गौरांग कोरगावकर (२४) यांच्यानंतर सुनील बिलावर (२०, रा. घोगळ, मडगाव), जॉयस्टन फर्नांडिस (२०, नेरुल) यांना अटक केली होती. आता इम्रान बेपारी (३८, रा. सांताक्रुझ), अक्षय तलवार (२२, रा. ताळसाझर), अविनाश गुंजीकर (३१, रा. नावेली), परशुराम राठोड (३२, रा. बेळगाव), दीपक कट्टीमणी (४७, रा. आके बायश), अमर कुलाल, ताहीर, सलीम या संशयितांना अटक केली आहे.
फातोर्डा पोलिसांनी ‍या प्रकरणात शनिवारी रात्री महेंद्र नाईक (२१, रा. चिंबल ), लुकआऊट नोटीस जारी केलेला राहुल तलवार व मंदार प्रभू गावकर (बोरी) या दोन संशयितांना फातोर्डा पोलिसांनी अटक केली होती. मंदार प्रभू गावकर हा अमोघ नाईक याचा सहकारी असून पोलीस त्याचा शोध घेत आहेत.
संशयितामध्ये सरकारी कर्मचारीही सामील
या प्रकरणातील एक संशयित दीपक कट्टीमणी हा सरकारी कर्मचारी असून त्याने आरोपींना राहण्याची सोय करून दिल्याचे तपासात निष्पन्न झाले आहे. त्याने जामिनासाठी न्यायालयात अर्ज दाखल केला आहे.
आरोपींकडून इनोव्हा कार जप्त
पोलिसांनी सूरज नाईक बोरकर या संशयिताला फोंडा परिसरातून अटक केली असून, त्याच्याकडून हल्ल्यात वापरलेली इनोव्हा कार जप्त करण्यात आली आहे. तर राजस्थानमधून अटक करण्यात आलेला ओमसा हा राज्याबाहेरील गुन्हेगारांच्या संपर्कात असल्याचेही समोर आले असून, याबाबत पुढील तपास सुरू आहे.