मडगाव : मुंगूल येथे घडलेल्या गँगवॉर प्रकरणी तपासाची गती वाढवत फातोर्डा पोलिसांनी आणखी दोन संशयितांना ताब्यात घेतले आहे. राजस्थानहून ओमसा या संशयिताला अटक करण्यात आली असून बोरी येथील सूरज नाईक बोरकर यालाही गजाआड करण्यात आले आहे. न्यायालयाने त्यांना सात दिवसांची कोठडी सुनावली आहे. यानंतर या प्रकरणातील अटक झालेल्या संशयितांची संख्या २३ वर पोहोचली आहे. अजूनही काहींची अटक होण्याची शक्यता असल्याचे पोलिस सूत्रांनी सांगितले.
१२ ऑगस्ट रोजी मुंगूल माडेलमधील शगुन हॉटेलनजीक एका गाडीवर तलवार, कोयते, सोडा बॉटल्सचा वापर करून हल्ला करण्यात आला. यावेळी गोळीबारही झाला होता. हा प्रकार गँगवॉर असल्याचे पोलिसांनी स्पष्ट केले आहे. या घटनेत रफीक ताशान (२४) व युवकेश सिंग बदैला (२०) हे गंभीर जखमी झाले होते.
दक्षिण गोवा पोलीस अधीक्षक टिकमसिंग वर्मा यांच्या नेतृत्वाखाली तयार करण्यात आलेल्या विविध पथकांनी दक्षिण गोवा, उत्तर गोवा तसेच राज्याबाहेर कारवाई करत संशयितांना अटक केली. यापूर्वी अटक केलेल्यांमध्ये विल्सन कार्व्हालो, शाहरुख शेख (रा. दवर्ली), रसूल शेख (रा. मडगाव), मोहम्मद अली (२४), वासू कुमार (२४), सूरज माझी (१९), मलिक शेख (१८), गौरांग कोरगावकर (२४), सुनील बिलावर (२०, रा. घोगळ, मडगाव), जॉयस्टन फर्नांडिस (२०, नेरुल) यांचा समावेश आहे. तसेच इम्रान बेपारी (३८, रा. सांताक्रुझ), अक्षय तलवार (२२, रा. ताळसाझर), अविनाश गुंजीकर (३१, रा. नावेली), परशुराम राठोड (३२, रा. बेळगाव), दीपक कट्टीमणी (४७, रा. आके बायश), अमर कुलाल, ताहीर, सलीम यांनाही अटक झाली आहे.
यापैकी दीपक कट्टीमणी हा सरकारी कर्मचारी असून त्याने संशयितांच्या संपर्कात राहत त्यांच्या वास्तव्याची सोय केल्याचे पोलिस तपासात स्पष्ट झाले आहे. त्याने जामिनासाठी न्यायालयात अर्ज सादर केला आहे. दरम्यान, शनिवारी रात्री फातोर्डा पोलिसांनी महेंद्र नाईक (२१, रा. चिंबल), राहुल तलवार (ज्याच्यावर लुकआऊट नोटीस होती) व मंदार प्रभू गावकर (बोरी) यांना अटक केली. यानंतर फोंडा परिसरातून सूरज नाईक बोरकर याला अटक करण्यात आली. त्याच्याकडून हल्ल्यात वापरलेली इनोव्हा कार जप्त करण्यात आली आहे. त्याचवेळी राजस्थान येथून ताब्यात घेतलेला ओमसा हा राज्याबाहेरील गुन्हेगारांशी संपर्कात असल्याचे निष्पन्न झाले असून त्याबाबतचा तपासही सुरू आहे.
