कळंगुट पोलिसांची कारवाई : पश्चिम बंगालमधील पाच जणांना अटक
म्हापसा : ‘पोर्टसिप यूसी’ नामक अॅपमार्फत ऑनलाईन संगणक सेवा देण्याच्या नावाखाली विदेशी नागरिकांची लुबाडणूक करणाऱ्या कॉल सेंटरचा कळंगुट पोलिसांनी पर्दाफाश केला. या फसवणूक प्रकरणी पोलिसांनी पश्चिम बंगाल मधील पाच जणांना अटक केली असून हे कॉल सेंटर सावतावाडा, बागा येथील एका फ्लॅटमध्ये थाटण्यात आले होते.
अभिषेक हरीराम पुरी (२७), मोह. फरीद (२८), एसके अमिर आलम (३८), गुड्डू रमेश शॉ (२९) व अजोय उमेश गीर (१९) यांचा अटक केलेल्या संशयितांमध्ये समावेश असून ते पश्चिम बंगालमधील रहिवासी आहेत. संशयितांकडून तीन लॅपटॉप, आठ मोबाईल व इतर वस्तू मिळून एकूण ३ लाखांचे साहित्य जप्त करण्यात आले आहे.
पोलिसांनी ही कारवाई गुरुवारी, दि. १७ रोजी रात्री ८ वाजण्याच्या सुमारास केली. घटनास्थळी बनावट कॉल सेंटर सुरू असल्याची माहिती पोलिसांना मिळाली होती. पोलीस निरीक्षक परेश नाईक यांच्या मार्गदर्शनाखाली उपनिरीक्षक हरीष वायंगणकर, किरण नाईक व सहकारी पथकाने सदर फ्लॅटवर छापा टाकला आणि संशयितांना अटक केली.
संशयित आरोपींनी विदेशी नागरिकांची आर्थिक फसवणूक करण्यासाठी पोर्टसिप यूसी या अॅपचा वापर केला. संशयित टोळीने अमेरिका व यूके सारख्या देशात संकेतस्थळावर वरील अॅपची जाहिरात टाकली होती. सदर जाहिरात वाचून विदेशी नागरिक आपला संगणक दुरुस्ती करण्यासाठी संशयितांशी संपर्क साधत होते. त्यानंतर संशयित या नागरिकांना ऑनलाईन संगणकाची दुरुस्ती तसेच संगणकाचा स्पीड कमी झाल्याने ती वाढवून देण्याचा बहाणा करत. त्यानंतर ही सेवा देण्यासाठी गीफ्ट कार्डद्वारे सेवाशुल्क भरण्यास प्रवृत्त करीत हाेते. गीफ्ट कार्डची रक्कम ते भारतीय चलनात हस्तांतरीत करत. संशयितांनी अनेक विदेशी नागरिकांना अशाप्रकारे आपल्या जाळ्यात ओढून त्यांची लुबाडणूक केली आहे.
पोलिसांनी संशयितांविरुद्ध भा.न्या.सं. कलम ११(२)(ब), ३१९(२), ३१८(४), ३(५) व माहिती आणि तंत्रज्ञान कायदा कलम ६६ ड अन्वये गुन्हा नोंदवला आहे. पुढील तपास पोलीस करीत आहेत.
संगणक दुरुस्तीच्या बहाण्याने फसवणूक
संशयित व्यक्ती नागरिकांना ऑनलाईन संगणक दुरुस्तीची तसेच संगणकाचा वेग वाढवण्याची सेवा देण्याच्या बहाण्याने फसवत होते. त्यांनी या सेवेच्या बदल्यात गिफ्ट कार्डद्वारे शुल्क भरण्यास भाग पाडले. नंतर ही गिफ्ट कार्डांमधील रक्कम भारतीय चलनात रूपांतरित करून आर्थिक फसवणूक केली जात होती.
