रॉयल चॅलेंजर्स बंगळुरूचा ‘विराट’ विजय

अहमदाबाद : कन्नडमध्ये ‘ई साला कप नमदे’चा अर्थ मराठीत 'यावर्षी हा चषक आमचा' असे होते. अखेर ही टॅगलाईन रॉयल चॅलेंजर्स बंगळुरूने (आरसीबी) खरी करत तब्बल १८ वर्षांनी प्रथमच आयपीएल चषक पटकावला. किताबी लढतीत त्यांनी पंजाब किंग्जचा ६ धावांनी पराभव केला.

आरसीबी संघाने अखेर आयपीएल ट्रॉफी जिंकण्याचे आपले स्वप्न पूर्ण केले आहे. आयपीएल २०२५ च्या अंतिम सामन्यात त्यांनी पंजाब किंग्जचा ६ धावांनी पराभव करत स्पर्धेचे विजेतेपद पटकावले. आयपीएलच्या १८ वर्षांच्या इतिहासात आरसीबी पहिल्यांदाच चॅम्पियन बनला आहे, हा त्यांच्या चाहत्यांसाठी एक ऐतिहासिक क्षण आहे.

अहमदाबादच्या नरेंद्र मोदी स्टेडियमवर खेळल्या गेलेल्या या थरारक अंतिम सामन्यात, प्रथम फलंदाजी करणाऱ्या संघाने बाजी मारली. आरसीबीने प्रथम फलंदाजी करताना निर्धारित षटकांत १९१ धावांचे आव्हान उभे केले होते. या आव्हानाचा पाठलाग करताना पंजाब किंग्जचा संघ १८४ धावांपर्यंतच मजल मारू शकला, ज्यामुळे आरसीबीने ६ धावांनी विजय नोंदवला.

या विजयामुळे आरसीबीने अनेक वर्षांची प्रतीक्षा संपवली असून, त्यांच्या चाहत्यांनी देशभरात जल्लोष केला आहे. हा विजय आरसीबीच्या इतिहासातील एक सुवर्ण क्षण म्हणून कायम स्मरणात राहील.

आयपीएल २०२५ च्या अंतिम सामन्यात नाणेफेक गमावल्यानंतर प्रथम फलंदाजीस उतरलेल्या रॉयल चॅलेंजर्स बंगळुरू (आरसीबी) संघाने आश्वासक सुरुवात केली. सामन्याच्या तिसऱ्याच चेंडूवर फिल सॉल्टने दमदार षटकार मारला आणि अर्शदीप सिंगच्या पहिल्याच षटकात आरसीबीने १३ धावा वसूल केल्या.

मात्र, दुसऱ्याच षटकात जेमिसनने पुनरागमन करत ९ चेंडूत १६ धावा करणाऱ्या फिल सॉल्टला बाद केले. यानंतर मयंक अग्रवालने (२४ धावा, १८ चेंडू) विराट कोहलीसह डाव सांभाळण्याचा प्रयत्न केला. पॉवरप्लेमध्ये आरसीबीने एका विकेटवर ५५ धावा केल्या. पण, युजवेंद्र चहलने मयंक अग्रवालची विकेट घेतली.

यादरम्यान, विराट कोहली एका टोकावर टिकून होता, पण त्याच्या बॅटमधून धावा अपेक्षित वेगाने निघाल्या नाहीत. आठ षटकांनंतर आरसीबीने दोन विकेट गमावून ६९ धावा केल्या होत्या, तेव्हा विराटने १५ चेंडूत फक्त १९ धावा केल्या होत्या. त्याचे पहिले १५ चेंडू केवळ एका चौकारासह होते.

पाटीदारने (२६ धावा, २ षटकार) झटपट धावा केल्या, पण ११व्या षटकात जेमिसनने त्याला बाद केले. त्यानंतर विराट कोहलीचाही डाव जास्त काळ टिकला नाही; तो ३५ चेंडूंत ४३ धावा करून १५व्या षटकात अजमतुल्ला उमरझाईच्या गोलंदाजीवर बाद झाला.

विराट कोहली बाद झाल्यानंतर लिव्हिंगस्टोन (२५ धावा, १५ चेंडू) आणि जितेश शर्माने (२४ धावा, १० चेंडू) धावांचा वेग वाढवण्याचा प्रयत्न केला, पण त्यांना मोठी खेळी करता आली नाही. जितेशने दोन षटकार आणि दोन चौकार मारले. शेफर्डनेही ९ चेंडूत १७ धावांचे योगदान दिले.

मात्र, अर्शदीप सिंगने शेवटच्या षटकात तीन फलंदाजांना बाद करत आरसीबीला आणखी अडचणीत आणले.

पंजाब किंग्जसाठी जेमिसन (४ षटकांत ४८ धावा, ३ बळी) आणि अर्शदीप सिंग (४ षटकांत ४० धावा, ३ बळी) हे सर्वात यशस्वी गोलंदाज ठरले. त्यांच्या प्रभावी गोलंदाजीमुळे आरसीबीला मोठी धावसंख्या उभारता आली नाही.

आयपीएलमधील सर्वाधिक चौकार मारणाऱ्या फलंदाजांच्या यादीत विराट कोहलीने आता अव्वल स्थान पटकावले आहे.

त्याने आपल्या आयपीएल कारकिर्दीतील एकूण चौकारांची संख्या ७७१ पर्यंत नेली आहे. यापूर्वी हा विक्रम अनुभवी सलामीवीर शिखर धवनच्या नावावर होता, ज्याने ७६८ चौकार मारले होते.