📢 पणजी : ज्युनियर स्टेनोग्राफरपदासाठीची दुसरी सीबीटी परीक्षा (सीबीटी - ३) असो किंवा अन्य कोणतीही परीक्षा, एका उमेदवाराने दोनदा दिली असेल तर संबंधीत उमेदवाराने पहिल्यांदा दिलेल्या परीक्षेतील गुण ग्राह्य धरले जातील. गोवा कर्मचारी भरती आयोगाने नोटीस जारी करून ही सूचना दिली आहे. एलडीसी पदासाठी झालेली सीबीटी परीक्षा ३० उमेदवारांनी दोनदा दिली. यामुळे आयोगाने ही बाब स्पष्ट केली आहे.
✍️ एलडीसी पदासाठीच्या दोन्ही सीबीटी परीक्षा पार पडल्या असून निकालही जाहीर झाले आहेत. ज्युनियर स्टेनोग्राफर पदासाठीची दुसरी सीबीटी परीक्षा (सीबीटी ३) २५ मे रोजी होणार आहे. काही उमेदवार विविध गटांसाठी (सर्वसामान्य, इडब्लूएस) स्वतंत्रपणे अर्ज सादर करतात. वेगवेगळी अॅडमीट कार्ड जारी झाल्याने ते दोनदा (प्रत्येक गटासाठी) परीक्षेला बसतात. अशा उमेदवारांचे पहिल्यांदा दिलेल्या परीक्षेतील गुण ग्राह्य धरले जातील, असे आयोगाने कळविले आहे. उदेवारांनी शक्यतो दोनदा परीक्षेला बसू नये. दोन अर्ज भरल्याने अॅडमीट कार्ड दोन मिळाली असली तरी दोनदा परीक्षेला बसण्याची आवश्यकता नाही.
ℹ️ एलडीसी पदासाठीच्या सीबीटी परीक्षेला ३० उमेदवार दोनदा बसले. उमेदवारांची संख्या जास्त असल्याने ही परीक्षा विविध ठिकाणी अधिक दिवस घ्यावी लागली. यामुळे काही उमेदवाराना दोनदा परीक्षा देणे सहज शक्य झाले, अशी माहिती कर्मचारी भरती आयोगाचे सचिव शशांक ठाकूर यांनी दिली.
