‘ऑपरेशन सिंदूर’ : मुकेश अंबानींकडून सशस्त्र दलांचे कौतुक

मुंबई : रिलायन्स इंडस्ट्रीजचे (Reliance Industries) अध्यक्ष आणि व्यवस्थापकीय संचालक मुकेश अंबानी (Mukesh Ambani) यांनी ‘ऑपरेशन सिंदूर’ (Operation Sindoor) या भारतीय सशस्त्र दलाने राबविलेल्या मोहिमेचे कौतुक केले आहे. वायुदलाच्या कारवाईला ‘अचूक आणि शक्तिशाली’ अशी उपमा देत अंबानी यांनी पंतप्रधान नरेंद्र मोदींच्या (Narendra Modi) नेतृत्वाला पाठिंबा दर्शविला आहे.

गुरुवारी जारी केलेल्या निवेदनात अंबानी म्हणाले की, देश दहशतवादाविरुद्ध एकजूट, दृढनिश्चयी आणि निश्चयाने अढळ उभा आहे. रिलायन्स कुटुंब भारताची एकता आणि अखंडता जपण्यासाठी कोणत्याही उपाययोजनांना पाठिंबा देण्यास तयार आहे. ऑपरेशन सिंदूर घडवून आणणाऱ्या आमच्या भारतीय सशस्त्र दलांचा आम्हाला खूप अभिमान आहे. सर्व प्रकारच्या दहशतवादाच्या संकटाविरुद्ध भारतीय एकजूट आहेत. पंतप्रधान नरेंद्र मोदी यांच्या धाडसी आणि निर्णायक नेतृत्वाखाली, भारतीय सशस्त्र दलांनी सीमेपलीकडून होणाऱ्या प्रत्येक चिथावणीला अचूक आणि शक्तीने प्रत्युत्तर दिले आहे.

पंतप्रधान मोदींच्या नेतृत्वाने हे दाखवून दिले आहे की, भारत दहशतवादाच्या बाबतीत कधीही गप्प राहणार नाही आणि आपण आपल्या भूमीवर, आपल्या नागरिकांवर किंवा आपल्या राष्ट्राचे रक्षण करणाऱ्या शूर पुरुष आणि महिलांवर एकही हल्ला सहन करणार नाही. गेल्या काही दिवसांत आपल्या शांततेच्या आड येणाऱ्या प्रत्येक धोक्याला दृढ आणि निर्णायक कारवाईने तोंड दिले जाईल, हे देशाने दाखवून दिले आहे. रिलायन्स कुटुंब आपल्या देशाची एकता आणि अखंडता जपण्यासाठी कोणत्याही उपाययोजनांना पाठिंबा देण्यास तयार आहे. भारत शांततेच्या बाजूने नेहमीच राहिला आहे. मात्र त्याच्या स्वाभिमान, सुरक्षितता किंवा सार्वभौमत्वासमोर कुठलीही तडजोड करणार नाही, असे मुकेश अंबानी आपल्या निवेदनात म्हणाले आहेत.