मानस पणजीसमोर २१८ धावांचे आव्हान : चौगुलेला अजून ९ बळींची गरज
पणजी : गोवा प्रीमियर लीगच्या अंतिम सामन्यात चौगुले स्पोर्ट्स क्लबने मानस पणजी जिमखानावर वर्चस्व गाजवत आपली स्थिती भक्कम केली असली तरी सामना रोमहर्षक होणार आहे. पहिल्या डावातील कामगिरी पाहता पणजी जिमखाना संघाला २१८ धावा करणे तिसऱ्या व अखेरच्या दिवशी फारच कठीण जाणार आहे. त्यांनी दिवसाचा खेळ संपला तेव्हा १ गडी गमावून १ धाव केली होती.
गोवा प्रीमियर लीगच्या अंतिम सामन्याचा दुसरा दिवस अतिशय नाट्यमय ठरला. तब्बल १९ गडी बाद झाले आणि सामना निर्णायक वळणावर पोहोचला. मानस पणजी जिमखानाच्या दुसऱ्या डावाची सुरुवातही निराशाजनक झाली. जेव्हान चित्तम शून्यावर बाद झाल्यानंतर मंथन खुटकर (१*) आणि अन्य फलंदाजांसह संघाने दिवसअखेर १ धावावर 1 गडी गमावला. विजयासाठी त्यांना अजून २१८ धावांची गरज असून ९ विकेट्स हातात आहेत.
चौगुले स्पोर्ट्स क्लबचा डाव कोलमडला
चौगुले संघाने दुसऱ्या डावाची सुरुवात दमदार केली होती. आर्यन नार्वेकर (५०) आणि रिजुल पाठक (२५) यांनी ८३ धावांची भागीदारी करत संघाला मजबूत स्थितीत नेले. मात्र, पुलकित नारंग आणि तनय त्यागराजनने ही जोडी फोडत मानस पणजीला सामन्यात परत आणले. त्यानंतर क्षितिज पटेल (२६) आणि मनन हिंगराजिया (२६) यांनी डाव सावरताना ५० धावांची भागीदारी रचली. पण हेरंब परबने क्षितिजचा स्वत:च्या गोलंदाजीवर झेल घेत ही जोडी फोडली.
यामुळे चौगुले संघाचा डाव कोलमडला आणि हेरंब परबच्या भेदक गोलंदाजीपुढे त्यांचा पुढील डाव सावरणे कठीण झाले. हेरंबने अप्रतिम गोलंदाजी करत ५/२५ अशी कामगिरी केली. अखेरीस महेश पिथिया (नाबाद १९) याने काही मोठे फटके लगावले. मात्र, चौगुले संघ ५७.५ षटकांत १८० धावांवर गारद झाला.
मानस पणजीचा पहिला डाव गडगडला
पहिल्या डावात मानस पणजी जिमखानाचा खेळ निराशाजनक ठरला. संघ १२८ धावांत गारद झाला आणि चौगुलेला ३८ धावांची आघाडी मिळाली. दुसऱ्या दिवसाच्या सुरुवातीस मानस ७४/२ अशा स्थितीत होता, पण पुढील ८ षटकांतच ९८/६ अशी परिस्थिती झाली. एकमेव प्रतिकार करणारा फलंदाज योगेश कावठणकर (४२ धावा, १३३ चेंडू) सातव्या गड्यासरशी बाद झाला आणि त्यानंतर संघ ५० षटकांत १२८ धावांत गारद झाला.
दरम्यान, चौगुलेच्या गोलंदाजांनी शानदार कामगिरी केली. समर्थ राणे (४/३२) आणि कर्णधार दर्शन मिसाळ (४/३७) यांनी अचूक मारा करत मानसला मोठा फटका दिला.
तिसऱ्या दिवशी सामन्याचा निर्णायक टप्पा
आता सामना निर्णायक टप्प्यावर आहे. मानस पणजी जिमखानासमोर २१८ धावांचे कठीण आव्हान आहे. पहिल्या डावातील कामगिरी पाहता हा पाठलाग त्यांच्यासाठी आव्हानात्मक ठरेल. दुसरीकडे, चौगुलेच्या गोलंदाजांनी पहिल्या डावात प्रभावी कामगिरी केली होती आणि आता त्यांना फक्त ९ विकेट्स घ्यायच्या आहेत. त्यामुळे हा सामना एका रोमांचक वळणावर येऊन ठेपला आहे.
