म्हणाले - बहुजन नेत्याला अध्यक्ष करावे
पणजी : सध्याचा मगो पक्ष एका कुटुंबापुरता मर्यादित झालेला आहे. तो भाऊसाहेबांचा पक्ष उरलेला नाही. आताचा पक्ष भाऊसाहेबांचाच आहे हे दाखवून द्यायचे असेल तर जीत आरोलकर किंवा अन्य बहुजन नेत्याला अध्यक्ष करावे. भाजपला सध्याच्या मगोसोबत युती करण्याची गरज नाही. भाजपने आदेश दिल्यास फोंडा तालुक्यातील सर्व जबाबदारी मी स्वीकारण्यास तयार आहे असे प्रतिपादन कला आणि संस्कृती मंत्री गोविंद गावडे यांनी केले. सोमवारी पणजीत त्यांनी माध्यमांसोबत संवाद साधला.
गावडे म्हणाले की, भाऊसाहेबांचा मगो पक्ष आणि आताचा मगो वेगळा आहे. मगोपमधून अनेक बहुजन नेते बाहेर पडले आहेत. काशिनाथ जल्मी, स्व. लवू मामलेदार, नरेश सावळ, बाबू आजगावकर, दीपक पावसकर यासारख्या नेत्यांनी मगोसाठी सर्वस्व वाहिले होते. तरीदेखील त्यांना पक्ष सोडावासा का वाटला याचा विचार झाला पाहिजे. भाऊसाहेबांनी स्थापन केलेला पक्ष हा गोव्यातील बहुजन समाजाचा, ताळागाळातील जनतेचा पक्ष होता. सध्याचा पक्ष माधवरावांच्या गोठ्यातील पक्ष झाला आहे.
ते म्हणाले, माझ्या वडिलांनी, मी पूर्वी मगो पक्षासाठी काम केले होते. आता जे मोठ्या तोंडाने सांगत आहेत ते पूर्वी काँग्रेसचे एजंट म्हणून काम करत होते. १९९९ मध्ये हेच लोक काँग्रेसला मत द्या म्हणून प्रचार करत होते. मगोतील बैल आणि म्हशींनी माझ्यावर टीका करण्यापूर्वी विचार करावा. कारण आज जे बोलत आहेत त्यांच्या राजकारणातील श्रीगणेशा मी करून दिला आहे. १९९९ मध्ये मी, विनोद नागेशकर, स्व शिवदास वेरेकर यांनी प्रयत्न केल्यानेच यांना तिकीट मिळाले होते. २०१२ पासूनच या पक्षासोबत युती करू नये असे माझे पक्के मत आहे.
मगो पक्षाला वाढवायचे असते तर ते काम याआधीच झाले असते. मात्र पक्ष एका कुटुंबापुरता मर्यादित असल्याने हे शक्य झालेले नाही. स्व लवू मामलेदार जेव्हा फोंड्यातून निवडून आले होते. तेव्हा देखील मंत्री पद यांच्याच कुटुंबातील व्यक्तीला मिळाले होते. सध्या या लोकांना केवळ टक्केवारी आणि कमिशन हवे आहे. त्यांना पक्षाच्या भल्या बुऱ्याचा फरक पडत नाही. याआधी मी शिरोडा, प्रियोळ ,फोंडा मध्ये काम करून दाखवले आहे. पूर्वी मी मडकई मध्ये देखील निवडणूक लढवली होती. तिथे आजही माझे कार्यकर्ते असल्याचे गावडे यांनी सांगितले.
