मासळी विक्रेत्याचे किळसवाणे कृत्य कॅमेऱ्यात कैद ! झाले क्षणात व्हायरल
पणजी : ताजे फडफडीत मासे हा गोवेकरांचा जिव्हाळ्याचा विषय. तीनचार दिवस जेवणात शितकडी किंवा तळलेले मासे न दिसल्यास गोवेकर स्वतः माशासारखा फडफडतो. दरम्यान सोशल मिडियावर व्हायरल होणाऱ्या एका व्हिडिओमुळे मच्छीप्रेमींच्या तळपायाची आग मस्तकात गेली आहे. एका मासळी विक्रेत्याने आपला स्टॉल लावला आहे. समोरील कंटेनर्समध्ये मासे आहेत. हा विक्रेता आपल्या स्टॉलच्या बाजूलाच असलेल्या गटारातून बादल्या भरून अनेक वेळा मासळी असलेल्या कंटेनर्समध्ये टाकत आहे. दरम्यान सदर व्हिडिओ हा पॉवर हाऊस, आके-मडगाव येथील असून व्हिडिओचे चित्रीकरण करणाऱ्याने तसे त्यात म्हटले आहे.
पहा हा व्हिडिओ
व्हिडिओ | अपडेट्स : लोकांच्या जीवाशी खेळ.
— गोवन वार्ता UPDATES (@goanvarta) March 27, 2025
पॉवर हाऊस, आके मडगाव, येथे एका मासळी विक्रेत्याचे कृत्य कॅमेऱ्यात कैद.
जवळच असलेल्या नाल्यातून घाण पाणी तो विक्रीसाठी आणलेल्या मासळीवर ओतत आहे. त्याच्या या कृत्यामुळे हे असले मासे खाणाऱ्यांच्या आरोग्यावर वाईट परिणाम.होऊ शकतो. pic.twitter.com/IYx1TZCRGV
दरम्यान हा व्हिडिओ कधीचा आहे याबाबत संभ्रम आहे. पण सामान्य जनतेच्या जीवाशी दिवसाढवळ्या सुरू असलेला हा खेळ पाहून कुणाचेही डोके फिरेल. विविध सोशल मीडिया हँडल्सवर हा बराच व्हिडिओ व्हायरल होत आहे.
सामान्य जनतेच्या जीवाशी हा अशा प्रकारे खेळ काही नवीन नाहीच. अनेकजण अशी कृत्ये करतात. पण सापडला तरच तो चोर या उक्तीच्या हिशेबाने सगळेच काही आलबेल आहे असेच म्हणावे लागेल. याआधी मडगावातच फोर्मेलीनचा मुद्दा गाजला होता. त्यात आता या मासळी विक्रेत्याची अशी थेरं समोर आल्यानंतर तर लोकांत धास्तीच पसरली आहे. संबंधित यंत्रणेने अशा विक्रेत्यांवर कडक कारवाई करावी अशी मागणी जनमानसातून सध्या व्यक्त केली जात आहे.
