बंगळुरू : राष्ट्रीय स्वयंसेवक संघाने (आरएसएस) शनिवारी स्पष्ट केले की त्यांच्या नवीन अध्यक्षांच्या निवडीवरून भाजपशी कोणतेही मतभेद नाहीत. हा निर्णय पूर्णपणे भाजपवर अवलंबून आहे. तथापि, भाजप अध्यक्षपदाची निवडणूक लवकरच होईल. शनिवारी बंगळुरू येथे अखिल भारतीय प्रतिनिधी सभेत पत्रकार परिषदेत बोलताना, आरएसएसचे सहसरचिटणीस अरुण कुमार यांनी भाजप अध्यक्षांच्या प्रलंबित निवडणुकीबद्दल विचारलेल्या प्रश्नाचे उत्तर दिले.
भाजप अध्यक्षांच्या निवडीसाठी समन्वय समितीची बैठक होणार नाही
संघाचे सदस्य ३२ संलग्न संस्थांमध्ये काम करतात. प्रत्येक संघटना स्वतंत्र आहे तसेच स्वतःची निर्णय प्रक्रिया, स्वतःची सदस्यता रचना आणि स्थापित प्रक्रिया आहेत. भाजप अध्यक्षांच्या निवडीसाठी समन्वय समितीची बैठक होणार नाही. भाजप आणि आरएसएसमध्ये कोणताही फरक नाही. आम्ही समाज आणि देशासाठी एकत्र काम करतो. आजही आम्ही त्याच विश्वासाने आणि समजुतीने काम करत आहोत. पक्षाची सदस्यता प्रक्रिया पूर्ण झाली आहे आणि विविध पातळ्यांवर समित्या स्थापन करण्यात आल्या आहेत. येत्या काही दिवसांत भाजप अध्यक्ष निवडले जातील असे ते म्हणाले.
आमच्या संघटनेचे वेगळेपण हे आहे की आम्ही बारकाव्यांकडे सतत लक्ष देतो. आरएसएसचे अंतिम ध्येय समाजात परिवर्तन घडवणे आहे. संघ ही केवळ एक संघटना नाही, तर ती सामाजिक परिवर्तनासाठी उभे ठलेले एक जनआंदोलन आहे. आम्ही सतत प्रयत्न करत राहतो आणि त्या उपक्रमांचे सतत मूल्यांकन केले जाते. निर्धारित मूल्यांच्या चौकटीत राहूनच सगळ्या गोष्टी पार पडत आहेत. फक्त काही दिवस वाट पहा, सर्व काही स्पष्ट होईल असे सरचिटणीस अरुण कुमार म्हणाले.
