कोहली-सॉल्टची वादळी फलंदाजी : केकेआरचा लाजिरवाणा पराभव
कोलकाता : रॉयल चॅलेंजर्स बंगळुरू संघाने विजयाने सुरुवात केली आहे. आरसीबीने केकेआरला त्यांच्या घरच्या मैदानावर ७ विकेट्सने पराभूत केले. आरसीबीने ३ वर्षांनंतर केकेआरवर शानदार विजय मिळवला आहे. विराट कोहली आणि फिल सॉल्टची ९५ धावांची भागीदारी अन् विराट कोहलीच्या नाबाद ५९ धावांच्या जोरावर आरसीबीने पहिल्याच सामन्यात उत्कृष्ट विजय नोंदवला. गतविजेत्या केकेआर संघाला पहिल्याच सामन्यात पराभव पत्करावा लागला.
शनिवारी ईडन गार्डन्सवर झालेल्या सलामीच्या सामन्यात केकेआरने प्रथम फलंदाजी करताना २० षटकांत १७५ धावांचे लक्ष्य दिले होते. आरसीबीने हे लक्ष्य अवघ्या १६.२ षटकांत गाठले. विराट आणि सॉल्टने वादळी सुरूवात करत ९५ धावांची महत्त्वपूर्ण भागीदारी रचली.
बेंगळुरूने कोलकाताविरुद्ध आयपीएलमध्ये ३ वर्षानंतर विजय मिळवला आहे. यापूर्वी २०२२ च्या मोसमात आरसीबीने केकेआरचा पराभव केला होता. या दमदार विजयासह आरसीबीने गुणतालिकेत आपले खातेही उघडले आहे. आरसीबीने १७व्या षटकात हा सामना जिंकल्याने त्यांचा नेट रन रेटही चांगला झाला आहे.
रॉयल चॅलेंजर्स बंगळुरूच्या या दमदार विजयात फिल सॉल्ट, विराट कोहली आणि नवा कर्णधार रजत पाटीदार यांनी महत्त्वाची भूमिका बजावली. तिघांनीही आपल्या स्फोटक फलंदाजीने सामन्यात एकतर्फी विजय मिळवला आणि केकेआरला सामन्यात पुनरागमन करण्याची संधी दिली नाही. १७ धावांचा पाठलाग करताना सॉल्ट आणि कोहलीने पहिल्या ६ षटकांत ८० धावा केल्या. या दोघांनी केवळ ८.३ षटकांत ९५ धावांची सलामी भागीदारी रचली.
१८० च्या स्ट्राईक रेटने ३१ चेंडूत ९ चौकार आणि २ षटकारांसह ५६ धावा करून सॉल्ट वरुण चक्रवर्तीच्या गोलंदाजीवर बाद झाला. देवदत्त पडिक्कलही १० चेंडूत १० धावा करून पॅव्हेलियनमध्ये परतला, पण या दोघांच्या बाद झाल्याचा बंगळुरूवर फारसा परिणाम झाला नाही. यानंतर आलेल्या कर्णधार रजत पाटीदारने १६ चेंडूत ५ चौकार आणि एका षटकारासह ३४ धावा करत संघाचा विजय सोपा केला. याशिवाय लियाम लिव्हिंगस्टोनने ५ चेंडूत २ चौकार आणि एका षटकारासह १५ धावा करत संघाला विजय मिळवून दिला. या विजयात विराट कोहलीची भूमिका महत्त्वाची होती. सलामीला आलेला विराट ३६ चेंडूत ९ चौकार आणि २ षटकारांसह ५९ धावा करत नाबाद परतला.
आरसीबीने गोलंदाजीचा निर्णय घेत चांगली सुरूवात केली. आरसीबीकडून हेझलवूडने पहिल्याच षटकात विकेट घेत चांगली सुरूवात केली. यासह पहिल्या २ षटकांत केकेआरने ५ धावा केल्या होत्या. पण आरसीबी हा दबाव कायम ठेवू शकली नाही. यानंतर आलेल्या अजिंक्य रहाणेने वादळी फलंदाजी करत २५ चेंडूत आपले अर्धशतक पूर्ण केले. याशिवाय सुनील नरेनबरोबर शतकी भागिदारी रचली.
रहाणेने प्रत्येक षटकात चौकार-षटकारांचा पाऊस पाडला. तर नरेनने देखील त्याला चांगली साथ देत आरसीबीची पहिल्याच सामन्यात धुलाई केली. अजिंक्य रहाणेने संघाला १० षटकांच्या आत १०० धावांचा टप्पा गाठून दिला. रहाणेने ३१ चेंडूत ६ चौकार आणि ४ षटकारांसह ५६ धावांची खेळी केली. तर सुनील नरेनने २६ चेंडूत चौकार आणि ३ षटकारांसह ४४ धावा केल्या.अजिंक्य रहाणेची विकेट गमावल्यानंतर केकेआरचा संघ कोसळला. २३.७५ कोटींचा वेंकटेश अय्यर ६ धावा करत क्लीन बोल्ड झाला. तर रिंकू सिंग आणि आंद्रे रसेलही फिरकीपटूंच्या गोलंदाजीवर क्लीन बोल्ड झाले. आरसीबीच्या फिरकीपटूंनी क्रुणाल पंड्याने उत्कृष्ट गोलंदाजी करत ३ विकेट घेतले.
कोहलीच्या केकेआरविरुद्ध १००० धावा पूर्ण
विराट कोहलीने केकेआरविरुद्ध १००० धावाही पूर्ण केल्या. विराटने आतापर्यंत चेन्नई सुपरकिंग्स, दिल्ली कॅपिटल्स, पंजाब किंग्स आणि केकेआरविरुद्ध १००० धावा केल्या आहे. त्यानंतर डेव्हीड वॉर्नरचा नंबर लागतो. त्याने पंजाब किंग्स आणि केकेअारविरुद्ध १००० धावा पूर्ण केल्या आहेत. केकेआरविरुद्ध सर्वाधिक धावांचा विक्रम डेव्हिड वॉर्नरच्या नावे आहे. त्याने केकेआरविरुद्ध १०९३ धावा केल्या आहेत. त्यानंतर रोहित शर्माचा नंबर लागतो. त्याने केकेआरविरुद्ध १०७० धावा केल्या आहेत.
वेगवेगळ्या संघांविरुद्ध १००० पेक्षा जास्त धावा
४ : विराट कोहली विरुद्ध सीएसके, डीसी, केकेआर, पीबीकेएस
२ : डेव्हिड वॉर्नर विरुद्ध केकेआर, पीबीकेएस
२ : रोहित शर्मा विरुद्ध केकेआर, डीसी
१ : शिखर धवन विरुद्ध सीएसके
आयपीएलमध्ये केकेआर विरुद्ध १००० पेक्षा जास्त धावा
१०९३ - डेव्हिड वॉर्नर
१०७० - रोहित शर्मा
१०००* - विराट कोहली
