पणजी : गोव्यात पर्यटन हंगामाला अधिकृत प्रारंभ होताच पर्यटन क्षेत्राला सकारात्मक गती मिळताना दिसत आहे. गेल्या आठवड्याभरात राज्यातील क्रूझ व्यवसायाला पर्यटकांकडून उत्तम प्रतिसाद मिळाला असून हा व्यवसाय ५० टक्क्यांहून अधिक क्षमतेने पूर्ववत सुरू झाला आहे. परवाने मिळण्याची प्रक्रिया वेळेत पूर्ण झाल्यामुळे स्थानिक व्यावसायिकांनी समाधान व्यक्त केले आहे. सध्या प्रामुख्याने भारतीय पर्यटकांची मोठी आवक सुरू असून, आंतरराष्ट्रीय चार्टर उड्डाणे सुरू झाल्यानंतर ब्रिटीश आणि इतर परदेशी पर्यटकांची संख्या अधिक वाढेल, असा विश्वास स्थानिक क्रूझ व्यावसायिकांनी व्यक्त केला आहे.
मात्र या सकारात्मक चित्रासोबतच पर्यटन क्षेत्रातील काही जुन्या आणि गंभीर अडचणी पुन्हा एकदा ऐरणीवर आल्या आहेत. पर्यटकांच्या वाढत्या संख्येच्या प्रमाणात प्रशासनाकडून पुरविल्या जाणाऱ्या मूलभूत सुविधा अद्याप अपुऱ्या पडत असल्याचे चित्र आहे. स्वच्छतागृहे, समुद्रकिनाऱ्यांची स्वच्छता, रस्ते, प्रकाशव्यवस्था आणि वाहनतळाची सुसज्ज व्यवस्था यांसारख्या प्राथमिक गरजा जागतिक दर्जाच्या असणे आवश्यक आहे. किनाऱ्यांच्या स्वच्छतेत काही प्रमाणात सुधारणा झाली असली तरी १०० टक्के स्वच्छता राखण्यात प्रशासन अपयशी ठरत आहे. यामुळे पर्यटकांना नाहक मनस्ताप सहन करावा लागत आहे.
याशिवाय, किनारपट्टी भागात सक्रिय असलेल्या टाउट्सचा प्रश्न अत्यंत गंभीर बनला आहे. हे दलाल पर्यटकांना क्लब, पार्ट्या आणि टूर पॅकेजचे आमिष दाखवून त्यांची आर्थिक फसवणूक करत आहेत. यासंदर्भात मुख्यमंत्री स्तरावर बैठका होऊन आदेश दिले गेले असले आणि व्यावसायिकांनी प्रशासनाला निवेदने दिली असली, तरी प्रत्यक्षात पोलीस आणि पर्यटन विभागाकडून पुरेशी कठोर कारवाई होताना दिसत नाही. कोलवा आणि बाणावली यांसारख्या भागांतही पर्यटकांची वर्दळ वाढली असली तरी नियमांची योग्य प्रकारे अंमलबजावणी होत नसल्याने स्थानिक व्यावसायिक चिंताग्रस्त आहेत. पर्यटनाचा दर्जा टिकवून ठेवण्यासाठी प्रशासनाने तातडीने कठोर उपाययोजना करणे गरजेचे बनले आहे.