नागोया : जपानमधील नागोया येथे सुरू असलेल्या आशियाई क्रीडा स्पर्धा २०२६ मध्ये भारताने अत्यंत यशस्वी आणि ऐतिहासिक कामगिरी केली आहे. स्पर्धेच्या ७ व्या दिवशी (२६ सप्टेंबर) भारताने एकाच दिवसात तब्बल ७ पदकांची लयलूट केली आहे. यामध्ये भारताच्या पुरुष आणि महिला कबड्डी संघाने इराणचा पराभव करत दोन्ही सुवर्णपदके आपल्या नावावर केली आहेत. या ऐतिहासिक यशासह भारताची एकूण पदकसंख्या ३० वर पोहोचली असून, यामध्ये ४ सुवर्ण, १२ रौप्य आणि १४ कांस्य पदकांचा समावेश आहे. चीन सध्या पदतालिकेत आघाडीवर आहे.
भारताच्या पुरुष कबड्डी संघाने अंतिम सामन्यात इराणविरुद्ध रोमहर्षक विजय मिळवला. पहिल्या हाफच्या शेवटी इराणने १८-१७ अशी अल्पशी आघाडी घेतली होती. मात्र, दुसऱ्या हाफमध्ये भारतीय संघाने जोरदार पुनरागमन केले. बचावात सुमितने अत्यंत महत्त्वाची कामगिरी बजावली, तर चढाईत (रेडिंग) अर्जुन देशवालने धडाकेबाज गुण वसूल केले. स्कोअर २१-२१ असा बरोबरीत आणल्यानंतर भारताने आघाडी घेतली आणि शेवटी ४०-३४ अशा दणदणीत फरकाने विजय मिळवत सुवर्णपदक जिंकले. यापूर्वी २०२२ च्या आशियाई क्रीडा स्पर्धेतही भारताने इराणला हरवून सुवर्णपदक पटकावले होते.
तसेच, महिलांच्या अंतिम सामन्यातही भारतीय संघाने असाच पराक्रम गाजवला. भारतीय महिला संघाने इराणचा ३७-३४ असा पराभव करत सुवर्णपदक पटकावले. सामन्याच्या अखेरच्या मिनिटांत भारतीय बचावपटूंनी अत्यंत संयम राखत इराणला विजयापासून रोखले.
अॅथलेटिक्स प्रकारात भारताच्या सावन बरवालने इतिहास रचत पुरुष मॅनहटन (मॅरेथॉन) प्रकारात रौप्य पदक पटकावले. त्याने २ तास ११ मिनिटे आणि ३७ सेकंद अशी वेळ नोंदवत हे यश मिळवले. विशेष म्हणजे, भारताने आशियाई क्रीडा स्पर्धेच्या या प्रकारात तब्बल ४४ वर्षांनंतर पदक जिंकले आहे. यापूर्वी १९८२ मध्ये नवी दिल्ली येथे झालेल्या आशियाई क्रीडा स्पर्धेत भारताने या प्रकारात कांस्य पदक जिंकले होते.
अॅथलेटिक्स, नेमबाजीत पदकांची भर
भारताच्या अॅथलेटिक्स शिलेदारांची चमकदार कामगिरी सुरूच असून, ताजिंगरपाल सिंग तूर याने गोळाफेक प्रकारात रौप्य पदक जिंकले. तर प्राचीने महिलांच्या ४०० मीटर धावण्याच्या शर्यतीत कांस्य पदक आपल्या नावावर केले. खराब हवामान आणि पावसामुळे नागपूरमधील स्पर्धा प्रभावित झाली असली, तरी भारतीय खेळाडूंनी आपली उत्कृष्ट लय कायम ठेवली. अनिमेश कुजुुर, हरिता भद्रा आणि उन्नती बोल्ल यांनी आपापल्या २०० मीटर शर्यतींच्या अंतिम फेरीत धडक मारली आहे. नेमबाजी प्रकारात भारताने ११ वे पदक आपल्या नावावर केले. महिलांच्या ५० मीटर रायफल थ्री-पोझिशन्स प्रकारात आषी चोकसे, तिलोत्तमा सेन आणि विदर्शा विनोद यांच्या भारतीय संघाने रौप्य पदक पटकावले.
स्क्वॉशमध्येही अंतिम फेरीत धडक
स्क्वाॅशच्या मिश्र दुहेरीत जोशना चिनप्पा आणि वलवान सेंथिलकुमार यांनी कांस्य पदक जिंकले. तर एकेरीच्या सामन्यात अनाहत सिंग हिने जपानच्या जागतिक क्रमवारीत ६ व्या स्थानी असलेल्या साटोमी वातनाबे हिचा ३-२ असा पराभव करत अंतिम फेरीत प्रवेश केला. सुरुवातीला दोन सेट गमावल्यानंतर अनाहतने शानदार पुनरागमन करत हा सामना जिंकला. दुसरीकडे, अभय सिंग यानेही पाकिस्तानच्या मोहम्मद इरफानचा ३-० (११-३, १२-१०, ११-६) असा पराभव करत पुरुषांच्या अंतिम फेरीत स्थान मिळवले आहे.
भारतीय पुरुष हॉकी संघाची उपांत्य फेरीत धडक
जपानमध्ये सुरू असलेल्या आशियाई क्रीडा स्पर्धा २०२६ मधील हॉकी प्रकारात भारतीय पुरुष संघाने आपला विजयी रथ कायम ठेवला आहे. गटातील सर्वात कठीण मानल्या गेलेल्या जपान संघाविरुद्धच्या सामन्यात भारताने २-० असा दणदणीत विजय मिळवला आहे. या विजयासह भारताने स्पर्धेत सलग चौथा विजय नोंदवत थेट उपांत्य फेरीत शानदार प्रवेश केला आहे. अतिशय चुरशीच्या झालेल्या या सामन्यात भारताकडून अभिषेक आणि कर्णधार हरमनप्रीत सिंग यांनी प्रत्येка एक गोल करत भारताच्या विजयात मोलाची भूमिका बजावली. संपूर्ण सामन्यात भारतीय संघाने आपले वर्चस्व कायम राखत जपानच्या बचावाला वारंवार खिंडारे पाडली. सलग चौथ्या विजयामुळे भारतीय संघाचे मनोधैर्य उंचावले असून, सुवर्णपदकाकडील वाटचाल अधिक मजबूत झाली आहे.