पणजी : कोलवाळ कारागृहात पुन्हा एकदा तंबाखूजन्य पदार्थांची तस्करी उघडकीस आली आहे. या प्रकरणात कारागृह उपअधीक्षक, आयआरबी एएसआय यांना निलंबित करण्यात आले आहे. मानवाधिकार आयोगाच्या शिफारसी असूनही तुरुंगांमध्ये मोबाईल जॅमर बसवण्यात आलेले नाहीत. मोबाईल जॅमर नसल्याने तुरुंगांमध्ये मोबाईलचा वापर केला जातो. मोबाईलचा वापर तस्करीसारख्या गुन्ह्यांना बळकटी देतो.
कोलवाळ तुरुंगाची योग्य देखभाल केली जात नाही. कैद्यांसाठी सुविधांचा अभाव आणि अपुरी सुरक्षा उपाययोजना असल्याचे वृत्त वृत्तपत्रांत आले. याची दखल घेऊन गोवा मानवाधिकार आयोगाने कोलवाळ तुरुंगाची पाहणी केली. यावेळी सार्वजनिक बांधकाम खाते, पोलीस आणि कारागृह महानिरीक्षक खात्याचे अधिकारी उपस्थित होते. तपासणीनंतर, मानवी हक्क आयोगाने नोव्हेंबरमध्ये आपला अहवाल सादर केला. अहवालात सीसीटीव्ही कॅमेऱ्यांसह मोबाईल जॅमर बसवण्याची शिफारस करण्यात आली. तुरुंगातील सीसीटीव्ही कॅमेरे निकृष्ट दर्जाचे आहेत. मोबाईल जॅमर नसल्यामुळे सुरक्षेबरोबरच इतर गैरप्रकार होण्याची शक्यता आहे. अहवाल प्रसिद्ध होऊन तीन महिने झाले आहेत. मोबाईल जॅमर बसवण्याचे काम अद्याप झालेले नाही. कैदी तसेच इतर लोक इतरांशी संवाद साधण्यासाठी मोबाईल चा वापर करत आहेत, असा संशय आहे.
मोबाईल जॅमर बसवण्यात काही तांत्रिक अडथळे आहेत. हे अडथळे दूर करण्यासाठी प्रयत्न सुरू आहेत. तुरुंगात मोबाईल जॅमर बसवले तर त्याचा परिणाम बाहेरही होईल, अशी परिस्थिती आहे, असे कारागृह उपमहानिरीक्षक डॉ. स्नेहल गोलतेकर यांनी सांगितले.
