कोकण रेल्वे पोलिसांकडून ११ वर्षीय मुलाची सुटका, आरोपीला दिले कोलवाळ पोलिसांच्या ताब्यात
म्हापसा : मुलांना खाऊचे, गिफ्टचे आमिष दाखवून त्यांच्यावर लैंगिक अत्याचार करणार्‍या पॉल फोन्सेका (रा. थिवी) याला कोकण रेल्वे पोलिसांनी कोलवाळ पोलिसांच्या ताब्यात दिले. संशयिताच्या ताब्यातून ११ वर्षीय मुलीची सुटकाही पोलिसांकडून करण्यात आली.
कोकण रेल्वे पोलिसांना मंगळवारी पहाटे ३ वाजण्याच्या सुमारास मिळालेल्या माहितीनुसार त्यांनी थिवी रेल्वे स्थानकावर धाव घेतली. कोकण रेल्वे पोलिसांनी लैंगिक शोषणाचा बळी पडलेल्या एका ११ वर्षीय मुलीची सुटका केली व या अल्पवयीन मुलीवर लैंगिक अत्याचार करणार्‍या संशयित पॉल फोन्सेका याला ताब्यात घेतले. पोलिसांकडून करण्यात आलेल्या चौकशीदरम्यान थिवी येथील रहिवासी असलेला पॉल फोन्सेका हा उपेक्षितवर्गातील लहान मुलांना आपल्या जाळ्यात अडकवत असे. यानंतर मुलांना भेटवस्तू देत, गाडीवरुन फिरवण्याचे आमिष दाखवून त्यांना जवळ घेत त्यांच्यावर अत्याचार करायचा.
बायलांचो एकवोट संस्थेच्या समुपदेशकाला या मुलीने धक्कादायक माहिती दिली. ११ वर्षीय पीडिताच्या लहान भावावरही संशयित पॉल याने लैंगिक अत्याचार केलेला आहे. इतरही अनेक मुलांनाही संशयित आमिष दाखवत आपल्या घरी नेत असे. त्यांना मादक द्रव्ये प्यायला देत, अश्लील चित्रफिती पाहण्यासाठी बळजबरी करायचा व त्या मुलांसोबतही तसेच प्रकार करायचा. मुलांवर अत्याचार केल्यानंतर त्यांना धमकावत असे.
एखाद्या मुलाने काही करण्यास नकार दिल्यास किंवा घरी पोहोचवण्यासाठी हट्ट धरल्यास त्यांना मारहाण करायचा असेही पीडित मुलाने सांगितले आहे. याप्रकरणी कोकण रेल्वे पोलिसांकडून संशयिताला ताब्यात घेण्यात आले व कोलवाळ पोलिसांकडे पुढील कारवाईसाठी स्वाधीन करण्यात आले आहे. कोकण रेल्वे पोलीस अधीक्षक हरिश मडकईकर, उपअधीक्षक नीलेश राणे यांच्या देखरेखीखाली पोलीस निरीक्षक सुनील गुडलर यांच्यासह रेल्वे पोलिसांकडून कारवाई करण्यात आली.
दरम्यान कोकण रेल्वे पोलिसांकडून पॉल फोन्सेका (५९, रा. थिवी) यास अटक करण्यात आली आहे. याप्रकरणी सदर मुलीच्या आई वडिलांनी तक्रार दिली होती. अत्याचाराची घटना २ फेब्रुवारी रोजी घडली. याबाबत हाती आलेल्या अधिक महितीनुसार, संशयिताने मुलीचे अपहरण करून तिचा लैंगिक छळ केला. हा प्रकार मुलीने आपल्या पालकांना सांगितला. पालकांनी पोलिसांत धाव घेत याबाबत तक्रार नोंदवली. या तक्रारीच्या आधारे कोलवाळ पोलिसांनी संशयिता विरुद्ध भा.न्या.स.च्या कलम १३७(२), ११५(२), ३५१(२), गोवा गोवा बाल कायदा कलम ८(२) व पोक्सो कायदा कलम ८ आणि १२ अन्वये गुन्हा दाखल करीत कोकण रेल्वे पोलिसांकडून ताब्यात घेतले व बुधवारी दुपारी त्याला अटक केली. पोलीस निरीक्षक विजय राणे यांच्या मार्गदर्शनाखाली उपनिरिक्षक रामचंद्र साटेलकर पुढील तपास करीत आहेत.
