पणजी : सरकारी नोकरीसाठी कोकणी भाषेचे ज्ञान असणे अनिवार्य आहे. त्यामुळे गोवा कोकणी अकादमी १ जानेवारीपासून कोकणीचे ज्ञान असलेले अधिकृत प्रमाणपत्र देण्यास सुरुवात करणार आहे. इच्छुक उमेदवारांची कोकणी भाषा तपासण्यासाठी चाचण्या घेतल्या जातील. यासंदर्भात गोवा सरकार लवकरच अधिसूचना प्रसिद्ध करेल, असे गोवा कोकणी अकादमीचे अध्यक्ष वसंत सावंत यांनी सांगितले.
गोवा कोकणी अकादमीने याबाबतची माहिती देण्यासाठी शणै गोयबाब सभागृहात पत्रकार परिषद घेतली होती या पत्रकार परिषदेला अध्यक्ष वसंत सावंत यांच्यासह दत्तराज नाईक यांचीही उपस्थिती होती.गोवा सरकारने/केंद्र सरकारने प्रशासनातील विविध पदांसाठी कोकणी भाषेचे ज्ञान आवश्यक केले आहे. त्या संदर्भात गोवा कोकणी अकादमीचे प्रमाणपत्र सरकार स्वीकारते. उमेदवारांच्या गरजा लक्षात घेऊन, अकादमी लेखी आणि तोंडी चाचण्या घेईल आणि त्यात उत्तीर्ण झाल्यास अर्जदाराला अवघ्या एका दिवसात कोकणी ज्ञान प्रमाणपत्र दिले जाईल, असे वसंत सावंत म्हणाले. येत्या काही दिवसांत शासनाची अधिसूचना जारी होणार आहे. गोवा कोकणी अकादमी ही प्रमाणपत्रे देण्यासाठी सरकारची अधिकृत संस्था असेल. यासाठी त्यांनी सरकारची परवानगी मागितल्याचेही सावंत यांनी सांगितले.
अकादमी अभ्यासक्रम समिती स्थापणार
गोवा कोकणी अकादमी १ जानेवारी २०२५ पासून प्रमाणन परीक्षा आयोजित करेल. त्या तयारीचा एक भाग म्हणून, अभ्यासक्रमाची रचना परीक्षेच्या उद्देशाने करण्यात आली आहे. अकादमीला क्षेत्रातील शैक्षणिक शिक्षणातील अनुभवी तज्ज्ञांची मदत मिळते. परीक्षेचा तात्पुरता अभ्यासक्रम तयार करण्यात आला आहे. दरम्यान, हा उपक्रम राबवण्यासाठी अकादमी एक अभ्यासक्रम समिती आणि एक परीक्षा समिती स्थापन करेल, असे वसंत सावंत यांनी सांगितले.
