ही आग नेमकी कशामुळे लागली याची माहिती अप्राप्त
मडगाव : बोर्डा फातोर्डा येथे इंटर डिझाइन टाईल्स शो रुमच्या नजिक रोझी फर्नांडिस यांच्या स्कोडा कारला आग लागण्याची घटना घडली. मडगाव अग्निशामक दलाकडून आगीवर वेळीच नियंत्रण आणत घराला आग लागण्यापासून वाचवले.
मिळालेल्या माहितीनुसार, बोर्डा फातोर्डा येथील रोझी फर्नांडिस यांच्या घराच्या परिसरात पार्क केलेल्या स्कोडा कारला अचानक आग लागण्याची घटना घडली. आग लागताच मडगाव अग्निशामक दलाला याची माहिती देण्यात आली. अग्निशामक दलाने तत्काळ घटनास्थळी धाव घेत गाडीवर पाण्याचा मारा केला.
कारवरील आगीवर वेळीच नियंत्रण आणल्यामुळे जुन्या घराला आग लागण्यापासून वाचले. ही आग नेमकी कशामुळे लागली याची माहिती मिळालेली नाही. याप्रकरणी कार पूर्णपणे जळून खाक झाली असल्याची माहिती मडगाव अग्निशामक दलाने दिली.
दरम्यान रावणफोंड नावेली येथे घरावर फणसाच्या झाडाची मोठी फांदी पडण्याची घटना सकाळी ११ वाजता घडली. यात घराचे सुमारे ३ हजाराचे नुकसान झालेले असून १ लाखाची मालमत्ता वाचवण्यात अग्निशामक दलाला यश आले आहे.
