अष्टपैलू अमेलिया केरच्या प्रदर्शनामुळे प्रथमच बनले विजेते
दुबई : जगाला नवीन महिला टी-२० वर्ल्ड चॅम्पियन मिळाला आहे. न्यूझीलंडने महिला टी-२० विश्वचषकाचे विजेतेपद पटकावले आहे. किवी संघाने अंतिम सामन्यात दक्षिण आफ्रिकेचा ३२ धावांनी पराभव करत विजेतेपद पटकावले.
न्यूझीलंडने टी-२० विश्वचषक जिंकून इतिहास रचला. न्यूझीलंडने टी-२० विश्वचषक जिंकण्याची ही पहिलीच वेळ आहे. अंतिम सामन्यात किवी संघाने शानदार खेळ केला. न्यूझीलंडच्या अमेलिया केरने अष्टपैलू प्रदर्शन करताना ४३ धावांच्या खेळीसह ३ बळीही मिळवले.
न्यूझीलंडने अंतिम सामन्यात दक्षिण आफ्रिकेविरुद्ध चमकदार कामगिरी केली. प्रथम फलंदाजी करण्यासाठी आलेल्या किवी संघाने २० षटकांत ५ गडी गमावून १५८ धावा केल्या. किवी संघासाठी स्टार खेळाडू केरने ४३ धावांची शानदार खेळी केली. फलंदाजीनंतर अमेलिया केरने गोलंदाजीतही कमाल केली. अमेलियाने गोलंदाजीत दक्षिण आफ्रिकेचे दोन मोठे विकेट घेत किवी संघाचा विजय निश्चित केला.
या सामन्यात प्रथम फलंदाजी करण्यासाठी आलेल्या न्यूझीलंडची सुरुवात खराब झाली. संघाला पहिला धक्का जॉर्जिया प्लिमरच्या रूपाने दुसऱ्या षटकाच्या पाचव्या चेंडूवर १६ धावांवर बसला. तिने २ चौकारांच्या मदतीने ९ (७ चेंडू) धावा केल्या.
त्यानंतर सुझी बेट्स आणि अमेलिया केर यांनी दुसऱ्या विकेटसाठी ३७ धावांची (३६ चेंडू) भागीदारी केली. ही भागीदारी ८व्या षटकाच्या चौथ्या चेंडूवर संपली जेव्हा सुझी बेट्स ३१ चेंडूंत ३ चौकारांच्या मदतीने ३२ धावा करून पॅव्हेलियनमध्ये परतली. त्यानंतर संघाला तिसरा धक्का ११व्या षटकात कर्णधार सोफी डिव्हाईनच्या (६) रूपाने बसला.
त्यानंतर ब्रुक हॅलिडे आणि अमेलिया केर यांनी चौथ्या विकेटसाठी ५७ धावांची (४४ चेंडू) भागीदारी केली. ही उत्कृष्ट भागीदारी १८व्या षटकात संपुष्टात आली जेव्हा ब्रुक हॅलिडे २८ चेंडूंत ३ चौकारांच्या मदतीने ३८ धावा करून पॅव्हेलियनमध्ये परतली.
यानंतर शानदार खेळी करणाऱ्या अमेलिया केरने ४३ धावा करत पॅव्हेलियनचा रस्ता धरला. सहाव्या विकेटसाठी मॅडी ग्रीन आणि इसाबेला गेज यांनी अभेद्य १७ धावांची (७ चेंडू) भागीदारी करत संघाला १५८ धावांपर्यंत नेले.
दक्षिण आफ्रिकेच्या गोलंदाजांची कामगिरी
दक्षिण आफ्रिकेकडून नॉनकुलुलेको म्लाबाने सर्वाधिक २ बळी घेतले. यादरम्यान तिने ४ षटकांत ३१ धावा दिल्या. बाकी अयाबोंगा खाका, नादिन डी क्लार्क आणि क्लो ट्रायॉन यांनी प्रत्येकी १ बळी घेतला. यादरम्यान अयाबोंगा खाकाने ४ षटकांत ४४ धावा, नदिन डी क्लर्कने २ षटकांत १७ धावा आणि क्लो ट्रायॉनने ४ षटकांत २२ धावा दिल्या.