यूपीपासून राजस्थानपर्यंत दहशतवादविरोधी पथके आणि स्थानिक पोलिसही सक्रिय झाले आहेत. रेल्वे अधिकाऱ्यांचे म्हणणे आहे की, अशा घटना चिंताजनक असून संपूर्ण निरीक्षण केले जात आहे. रविवारी संध्याकाळी गॅस सिलिंडर रुळावर ठेवल्यानंतरही कानपूरमध्ये कोणतीही दुर्घटना घडू शकली नसल्याचे अधिकाऱ्यांनी सांगितले.
नवी दिल्ली : यूपीमधील कानपूर ते राजस्थानमधील अजमेरपर्यंत रेल्वे रुळांवर गॅस सिलिंडर आणि सिमेंट ब्लॉक ठेवल्याची प्रकरणे समोर आली आहेत. गेल्या आठवडाभरात अशी ४ प्रकरणे समोर आली आहेत. या प्रकरणांमुळे रेल्वे प्रशासन हाय अलर्टवरअसून दक्षता घेतली जात आहे. आज पुन्हा राजस्थानच्या अजमेर येथील मांगलियावास पोलीस स्थानकाच्या हद्दीत मालगाडीला उलटवण्याचा कट थोडक्यात फसला. रेल्वे कर्मचाऱ्यांच्या प्रसंगावधानामुळे लागलीच उपाय योजना करून हा ७० किलो वजनी सीमेंट ब्लॉक हटवला गेला. सराधना-बांगड़ गावानजीक असलेल्या ५ किमी रेल्वे रुळावर हे सीमेन्टचे ब्लॉक्स ठेवले होते. दरम्यान रेल्वे कर्मचाऱ्यांनी मांगलियावास पोलीस स्थानकात याप्रकरणी फिर्याद नोंदवली आहे.
यूपीपासून राजस्थानपर्यंत दहशतवादविरोधी पथके आणि स्थानिक पोलिसही सक्रिय झाले आहेत. रेल्वे अधिकाऱ्यांचे म्हणणे आहे की, अशा घटना चिंताजनक असून संपूर्ण निरीक्षण केले जात आहे. रविवारी संध्याकाळी गॅस सिलिंडर रुळावर ठेवल्यानंतरही कानपूरमध्ये कोणतीही दुर्घटना घडू शकली नसल्याचे अधिकाऱ्यांनी सांगितले.ड्रायव्हरने वेळीच इमर्जन्सी ब्रेक लावल्यामुळे सर्वजण बचावले. कानपूरमधील घटनास्थळावरून पेट्रोल आणि माचिसच्या काड्याही जप्त करण्यात आल्याचे अधिकाऱ्यांनी सांगितले. यामुळे यामागे दहशतवादी कारस्थान असण्याची शंका बळावली आहे. वास्तविक, नुकताच पाकिस्तानस्थित दहशतवादी फरहातुल्ला घोरीने एक व्हिडिओ जारी केला होता. यामध्ये त्याने दहशतवाद्यांना मोठ्या प्रमाणावर रेल्वे गाड्या उलटवून पुरवठा साखळीला लक्ष्य करण्याचा प्रयत्न करण्यास सांगितले होते. भारताच्या पायाभूत सुविधांचे नुकसान करण्याचे त्यांचे लक्ष्य होते.
गेल्या वर्षी जूनपासून अशी १७ प्रकरणे उघडकीस आली आहेत, ज्यात जाडजूड लाकूड, दगड, गॅस सिलिंडर इत्यादी रेल्वे रुळांवर ठेवण्यात आल्या होत्या. किंवा सिग्नलशी छेडछाड करण्याचा प्रयत्न झाला. या सर्व प्रकरणी आरपीएफने गुन्हे दाखल केले असून तपास सुरू आहे. याशिवाय संवेदनशील भागात ट्रॅकचे पूर्ण निरीक्षण केले जात आहे. एवढ्या लांब मार्गावरील रुळांची सखोल तपासणी करणे शक्य नसून सर्वतोपरी प्रयत्न केले जात असल्याचे अधिकाऱ्यांनी सांगितले. तब्बल १७ प्रकरणात आत्तापर्यंत २९ अल्पवयीनांना अटक करण्यात आली आहे.
सोशल मीडियावर अनेक व्हिडिओ व्हायरल होत आहेत. यातत दगड, लोखंडी रॉड आणि सिमेंटचे ब्लॉक रेल्वे रुळांवर टाकले जात आहेत. कालिंदी एक्स्प्रेसच्या घटनेत गॅस सिलिंडरसोबतच रेल्वे रुळांवर बाटल्यांमध्ये केमिकल आणि स्फोटकेही सापडली आहेत. अशा अपघातांनंतर सुरक्षा यंत्रणांनीही सतर्क राहण्याची गरज आहे. या संदर्भात राजकीय पक्षांनीही सरकार तसेच रेल्वेकडे उच्चस्तरीय चौकशीची मागणी केली आहे.
या प्रकरणांमध्ये दहशतवादी कारस्थान असण्याची शक्यता नाकारता येत नाही, असे रेल्वे सूत्रांचे म्हणणे आहे. त्यामुळेच कानपूरमध्ये ही घटना उघडकीस येताच दहशतवादविरोधी पथकही घटनास्थळी पोहोचले. नुकतीच महाराष्ट्रातील सोलापूरमध्ये रेल्वे रुळावर स्लॅब टाकल्याची घटना समोर आली आहे. येथेही चालकाच्या सतर्कतेमुळे अपघात टळला. याशिवाय गेल्या आठवडाभरात वंदे भारत एक्सप्रेससह दोन गाड्यांवर दगडफेक झाली आहे. अशा घटनांमुळे रेल्वेच्या सुरक्षेचा प्रश्न निर्माण होत असून प्रवाशांमध्ये असुरक्षिततेची भावना निर्माण होत आहे.
