राजकोट येथे आज होणार मालिकेतील अंतिम लढत
राजकोट : भारत विरुद्ध ऑस्ट्रेलिया यांच्यातील तीन एकदिवसीय सामन्यांच्या मालिकेतील अंतिम सामना राजकोट येथे २७ सप्टेंबर रोजी खेळवला जाणार आहे. टीम इंडियाने या मालिकेत आघाडी घेतलेली आहे. या मालिकेतील दुसऱ्या सामन्यात भारताने ऑस्ट्रेलियाचा ९९ धावांनी पराभव केला होता. आता तिसऱ्या एकदिवसीय सामन्यात भारतीय क्रिकेट संघ ऑस्ट्रेलियावर मात करून त्यांना व्हाईटवॉश देण्यासाठी सज्ज झाला आहे.रोहित शर्मा, विराट कोहली आणि हार्दिक पांड्या अंतिम सामन्यातील प्लेईंग-११मध्ये खेळताना दिसणार आहेत. हा सामना राजकोट येथील सौराष्ट्र क्रिकेट असोसिएशनच्या स्टेडियमवर दुपारी १.३० वाजता खेळवला जाणार आहे.
रोहित शर्मा, विराट कोहली आणि हार्दिक पांड्या या मालिकेतील पहिल्या दोन सामन्यात खेळले नाहीत. त्यांच्या अनुपस्थितीत राहुलने संघाची कमान सांभाळली. मात्र, आता हे तिन्ही खेळाडू तिसऱ्या एकदिवसीय संघात खेळणार आहेत. शुबमन गिल आणि शार्दुल ठाकूर या दोन्ही खेळाडूंना शेवटच्या सामन्यात विश्रांती देण्यात आली आहे.
जसप्रीत बुमराह विश्रांतीमुळे दुसऱ्या एकदिवसीय सामन्यात खेळला नाही. बीसीसीआयने ट्वीट केले होते की, संघ व्यवस्थापनाने त्याला त्याच्या कुटुंबाला भेटण्याची आणि थोडा वेळ सुट्टी घेण्याची परवानगी दिली आहे. दुसऱ्या एकदिवसीय सामन्यासाठी बुमराहच्या जागी वेगवान गोलंदाज मुकेश कुमारचा संघात समावेश करण्यात आला होता. भारत विरुद्ध ऑस्ट्रेलिया यांच्यातील राजकोट येथे होणाऱ्या तिसऱ्या एकदिवसीय सामन्यासाठी बुमराह उपलब्ध असेल.
युजी चहलला ऑस्ट्रेलियाविरुद्धची मालिका आणि विश्वचषक स्पर्धेत स्थान मिळाले नाही. भारतीय स्टार यूजी चहल बराच काळ भारतीय संघातून बाहेर आहे आणि त्यामुळे त्याची ऑस्ट्रेलियाविरुद्धच्या एकदिवसीय मालिकेसाठीही निवड झालेली नाही. याशिवाय २०२३च्या एकदिवसीय विश्वचषक स्पर्धेतही त्याला दुर्लक्षित करण्यात आले आहे. मात्र, आर. अश्विन अजूनही विश्वचषक संघाचा भाग होऊ शकतो. त्याआधी भारतीय संघ ऑस्ट्रेलियाविरुद्ध तीन सामन्यांची एकदिवसीय मालिका खेळत असून, खेळाडू सातत्याने चमकदार कामगिरी करत आहे.
संघ असे
भारतीय संघ : रोहित शर्मा (कर्णधार), हार्दिक पांड्या, (उपकर्णधार), शुबमन गिल, विराट कोहली, श्रेयस अय्यर, सूर्यकुमार यादव, के.एल. राहुल (यष्टीरक्षक), इशान किशन (यष्टीरक्षक), रवींद्र जडेजा, शार्दुल ठाकूर, अक्षर पटेल, वॉशिंग्टन सुंदर, कुलदीप यादव, आर अश्विन, जसप्रीत बुमराह, मोहम्मद शमी, मोहम्मद सिराज.
ऑस्ट्रेलिया संघ : पॅट कमिन्स (कर्णधार), स्टीव स्मिथ, डेविड वॉर्नर, मार्नस लाबुशेन, अॅलेक्स करी, जोश इंग्लिस, मॅथ्यू शॉर्ट, सीन एबोट, नाथन एलिस, कॅमरन ग्रीन, जोश हेजलवुड, स्पेंसर जॉन्सन, मिशेल मार्श, ग्लेन मॅक्सवेल, तन्वीर संघा, मिशेल स्टार्क, अॅडम जाम्पा.
