नवी दिल्ली : कर्मचारी भविष्य निर्वाह निधी संघटनेने (ईपीएफओ) देशातील कोट्यवधी पीएफधारकांना मोठा दिलासा देणारा निर्णय घेतला आहे. आता पीएफ खात्यातील जमा रकमेपैकी ९० टक्के रक्कम काढता येणार आहे. यापूर्वी ही मर्यादा ७५ टक्के होती. तसेच नोकरी गमावल्यानंतर पीएफची रक्कम काढण्यासाठी असलेली १२ महिन्यांची प्रतीक्षा मर्यादा कमी करून केवळ दोन महिने करण्यात आली आहे. (Pf money can be withdrawn in 2 months if job is lost). त्यामुळे आर्थिक अडचणीच्या काळात कर्मचाऱ्यांना स्वतःच्या बचतीचा आधार लवकर घेता येणार आहे.
पीएफमधून आता ९० टक्के रक्कम काढण्याची मुभा
ईपीएफओच्या नव्या निर्णयानुसार, ५५ वर्षांपर्यंतच्या वयोगटातील सदस्यांना त्यांच्या संचित पीएफ निधीपैकी ९० टक्के रक्कम काढता येणार आहे. यापूर्वी ही मर्यादा ७५ टक्के होती. त्यामुळे वैद्यकीय गरज, आर्थिक अडचण किंवा अन्य आवश्यक खर्चांसाठी सदस्यांना अधिक रक्कम उपलब्ध होऊ शकणार आहे.
नोकरी गेल्यानंतर दोन महिन्यांत पैसे काढता येणार
नोकरी गमावलेल्या कर्मचाऱ्यांसाठीही ईपीएफओने महत्त्वाचा बदल केला आहे. यापूर्वी बेरोजगारीनंतर पीएफची रक्कम काढण्यासाठी १२ महिने प्रतीक्षा करावी लागत होती. आता ही मुदत कमी करून दोन महिने करण्यात आली आहे. त्यामुळे नोकरी गेल्यानंतर आर्थिक संकटाचा सामना करणाऱ्या कर्मचाऱ्यांना मोठा आधार मिळणार आहे.
निवृत्तीनंतर पीएफमधून दरमहा मिळणार पैसे
ईपीएफओच्या केंद्रीय न्यासी मंडळाने (सीबीटी) सिस्टिमॅटिक विथड्रॉवल प्लॅन (एसडब्ल्यूपी) सुरू करण्याच्या प्रस्तावालाही मंजुरी दिली आहे. या योजनेमुळे निवृत्त कर्मचाऱ्यांना पीएफमधील संपूर्ण रक्कम एकाच वेळी काढण्याऐवजी ठरावीक अंतराने मासिक हप्त्यांमध्ये मिळवता येणार आहे. विशेष म्हणजे, खात्यात शिल्लक राहिलेल्या रकमेवर ईपीएफओच्या निर्धारित दराने व्याजही मिळत राहणार आहे.
जोखमीच्या गुंतवणुकीची गरज कमी होणार
निवृत्तीनंतर नियमित उत्पन्नाचा स्रोत उपलब्ध करून देणे हा या योजनेचा मुख्य उद्देश आहे. पीएफमधील शिल्लक रकमेवर व्याज मिळत असतानाच दरमहा ठरावीक रक्कम मिळणार असल्याने निवृत्त कर्मचाऱ्यांना आपल्या बचतीचे नियोजन करणे सोपे होईल. तसेच नियमित उत्पन्नासाठी जोखमीच्या गुंतवणूक पर्यायांवर अवलंबून राहण्याची गरज कमी होऊ शकते.
सदस्याच्या मृत्यूनंतर वारसांनाही पर्याय
एसडब्ल्यूपीअंतर्गत मासिक पैसे मिळत असताना संबंधित सदस्याचा मृत्यू झाल्यास त्याच्या नामनिर्देशित व्यक्तीला किंवा वारसाला खात्यातील उर्वरित रक्कम एकरकमी काढण्याचा पर्याय उपलब्ध असेल. तसेच नियमित मासिक हप्ते सुरू ठेवण्याचाही पर्याय निवडता येणार आहे.
ईपीएफओच्या या सुधारणांमुळे पीएफ काढण्याच्या प्रक्रियेत अधिक लवचिकता येण्याबरोबरच निवृत्तीनंतरच्या आर्थिक नियोजनालाही मदत होणार आहे. विशेषतः नोकरी गमावलेल्या कर्मचाऱ्यांना आणि निवृत्त सदस्यांना या निर्णयाचा लाभ मिळण्याची अपेक्षा आहे.


