पणजी : म्हापसा येथील खोर्ली भागात आयोजित दहीहंडी उत्सवादरम्यान एका युवतीचा विनयभंग झाल्याची घटना उघडकीस आली असून, या प्रकरणी म्हापसा पोलिसांनी वेगाने कारवाई करत मूळ पंढरपूर येथील बाळाजी चव्हाण (वय २९) या संशयिताला अटक केली आहे. या घटनेनंतर म्हापसा पोलीस ठाण्याच्या परिसरात संतप्त नागरिकांनी गर्दी केल्याने काही काळ तणावाचे वातावरण निर्माण झाले होते.
मिळालेल्या माहितीनुसार, खोर्ली येथील सार्वजनिक दहीहंडी कार्यक्रमात गर्दीचा फायदा घेत संशयिताने युवतीशी गैरवर्तन केले. या प्रकारानंतर पीडित युवती, तिचे नातेवाईक आणि स्थानिक नागरिकांनी तात्काळ म्हापसा पोलीस ठाणे गाठले. पोलीस ठाण्याच्या आवारात जमा झालेल्या नागरिकांनी संशयितावर कठोर कलमांखाली गुन्हा दाखल करून त्याला तात्काळ अटक करण्याची जोरदार मागणी केली.
निदर्शनादरम्यान नागरिकांनी सार्वजनिक कार्यक्रमांमधील महिलांच्या सुरक्षेबाबत आणि कायदा-सुव्यवस्थेविषयी तीव्र चिंता व्यक्त केली. परिस्थितीचे गांभीर्य लक्षात घेऊन म्हापसा पोलीस ठाण्याच्या अधिकाऱ्यांनी आंदोलकांशी चर्चा करून त्यांना शांत केले आणि तपासाची चक्रे वेगाने फिरवली.
पीडित पक्षाच्या औपचारिक तक्रारीवरून म्हापसा पोलिसांनी तात्काळ संबंधित कलमांन्वये गुन्हा दाखल केला आणि संशयित बाळाजी चव्हाण याला ताब्यात घेतले. संशयिताला अटक केल्यानंतर पोलीस ठाण्यातील तणाव निवळला. पोलीस प्रशासनाकडून मिळालेल्या माहितीनुसार, संशयिताविरुद्ध पुढील कायदेशीर प्रक्रिया सुरू करण्यात आली असून परिसरात कायदा व सुव्यवस्था नियंत्रणात आहे.