नवी दिल्ली : पुरुषांमध्ये आढळणाऱ्या कर्करोगांमध्ये प्रोस्टेट कॅन्सर हा प्रमुख आजार मानला जातो. आयुष्यात प्रत्येक आठ पुरुषांपैकी एकाला या आजाराचा धोका असू शकतो, असा इशारा नायजेरियातील डॉक्टर पीटर अटांगव्हो यांनी दिला आहे. त्यांनी सोशल मीडियावरील पोस्टद्वारे प्रोस्टेट कॅन्सरची सुरूवातीची लक्षणे, धोकादायक टप्पे आणि उच्च जोखमीतील गटांविषयी माहिती दिली.
डॉ. अटांगव्हो यांच्या मते, प्रोस्टेट कॅन्सरची (Prostate cancer) सर्वात मोठी समस्या म्हणजे सुरूवातीच्या टप्प्यात तो जवळपास कोणतीही ठळक लक्षणे दाखवत नाही. त्यामुळे अनेक पुरुष ही लक्षणे “वयानुसार होणारे बदल” समजून दुर्लक्षित करतात. मात्र, वेळेत निदान झाल्यास हा कॅन्सर बरा होऊ शकतो.
सुरूवातीची लक्षणे कोणती?
प्रोस्टेट कॅन्सरच्या सुरूवातीच्या टप्प्यात दिसणारी काही महत्त्वाची लक्षणे पुढीलप्रमाणे आहेत:
विशेषतः रात्री वारंवार लघवी लागणे
लघवीचा प्रवाह कमकुवत किंवा मध्येच थांबणे
लघवी सुरू किंवा बंद करण्यास अडचण येणे
मूत्राशय पूर्ण रिकामे न झाल्याची भावना
लघवी करताना जळजळ किंवा अस्वस्थता
गंभीर अवस्थेतील संकेत
कॅन्सर पुढील टप्प्यात गेल्यावर काही गंभीर लक्षणे दिसू शकतात. त्यामध्ये :
लघवी किंवा वीर्यात रक्त येणे
अचानक वजन कमी होणे
अचानक लैंगिक क्षमतेत घट
पाठीच्या कण्यात किंवा हाडांमध्ये वेदना
कंबर, नितंब किंवा श्रोणी भागात सतत वेदना
ही लक्षणे दिसू लागल्यास कॅन्सर प्रगत अवस्थेत पोहोचल्याचे संकेत असू शकतात, असे डॉक्टरांनी स्पष्ट केले.
कोणाला अधिक धोका?
प्रोस्टेट कॅन्सरचा धोका पुढील गटांमध्ये अधिक असल्याचे सांगण्यात आले आहे :
५० वर्षांवरील पुरुष
कुटुंबात प्रोस्टेट कॅन्सरचा इतिहास असलेले पुरुष
जास्त चरबीयुक्त आहार आणि कमी व्यायाम
लठ्ठपणाची समस्या असलेले पुरुष
कृष्णवर्णीय पुरुषांमध्ये हा कॅन्सर अधिक आक्रमक स्वरूपात आढळतो
वरीलपैकी तीन किंवा अधिक बाबी लागू होत असल्यास
तातडीने डॉक्टरांचा सल्ला घेऊन तपासणी करावी, असे आवाहन करण्यात आले आहे.
