जीएचआरडीसीतर्फे २३ रोजी रोजगार मेळावा

पणजी : गोवा मनुष्यबळ विकास महामंडळातर्फे २३ एप्रिल रोजी वेर्णा येथे रोजगार मेळाव्याचे आयोजन करण्यात आले आहे. याद्वारे राज्यातील युवकांना विविध २५ कंपन्यांमधील ७४० रिक्त पदांसाठी संधी उपलब्ध करून देण्यात येणार आहे. मेळावा वेर्णा औद्योगिक वसाहतीमधील जीआयडीसी सभागृहात, सकाळी १० ते सायंकाळी ५ वा. या वेळेत आयोजित केला जाईल. मेळाव्याद्वारे पात्र गोमंतकीय तरुणांना रोजगाराच्या संधी उपलब्ध करून देण्यात येणार आहे.
मेळाव्याच्या आयोजनात कामगार व रोजगार आयुक्त कार्यालय (गोवा) आणि वेर्णा औद्योगिक संघटना सहभागी होणार आहेत. गोव्याचे १५ वर्षांचे वैध रहिवासी प्रमाणपत्र आणि आवश्यक शैक्षणिक पात्रता असणाऱ्या उमेदवारांना या मेळाव्यात सहभागी होता येईल. उमेदवारांनी रहिवासी प्रमाणपत्र रोजगार मेळ्याच्या दिवशी किंवा प्रत्यक्ष नियुक्तीच्या वेळी सादर करणे अनिवार्य आहे. मेळाव्यात आयटीआय , अभियांत्रिकी, फार्मसी, विज्ञान, वाणिज्य, व्यवस्थापन आणि कला या शाखांमधील उमेदवारांसाठी रोजगार संधी उपलब्ध असतील.
एकूण ७४० पदांपैकी, आयटीआयसाठी (१५० पदे) आणि अभियांत्रिकी पदविका (१२० पदे) उपलब्ध असतील. फार्मसी शाखेतील पदवी आणि पदव्युत्तर धारकांसाठी प्रत्येकी १०० पदे उपलब्ध आहेत. या मेळ्यात तंत्रज्ञ, अभियंते, कार्यकारी अधिकारी, विश्लेषक, व्यवस्थापक आणि सहाय्यक कर्मचारी यांसारख्या विविध प्रकारच्या भूमिकांसाठी नोकरीच्या संधी उपलब्ध करून दिल्या जातील. इच्छुक उमेदवारांनी https://labour.goa.gov.in/jobfair/ या संकेतस्थळाद्वारे आपली ऑनलाइन नोंदणी करणे आवश्यक आहे. नोंदणी प्रक्रिया मेळ्याच्या दिवशी दुपारी ३ वाजता बंद होईल. येण्या-जाण्याची सोय व्हावी म्हणून, उमेदवारांना टायटन क्लॉक टॉवर (टायटन जंक्शन) पासून वेर्ना इंडस्ट्रियल इस्टेट येथील जीआयडीसी हॉलपर्यंत नेण्यासाठी दोन कदंबा बसेसची व्यवस्था केली जाणार आहे.