होर्मुझ सामुद्रधुनीवरून तणाव शिगेला; कच्च्या तेलाचे दर ११० डॉलर पार

तेहरान :  इराण-अमेरिका-इस्त्रायल (Iran-USA-Israel) संघर्ष तीव्र होत असताना जागतिक बाजारात मोठी उलथापालथ झाली असून, कच्च्या तेलाचे दर पुन्हा एकदा ११० डॉलरच्या ($110) वर पोहोचले आहेत. पश्चिम आशियातील पुरवठा खंडित होण्याच्या भीतीमुळे गुंतवणूकदारांमध्ये चिंता वाढली आहे.

सोमवारी ब्रेंट क्रूडचे दर १.७१ डॉलरने (१.६%) वाढून ११०.७४ प्रति बॅरल इतके झाले. त्याच वेळी अमेरिकन डब्ल्यूटीआय (WTI ) क्रूडही ११३ डॉलरच्या पुढे गेली. होर्मुझ सामुद्रधुनीनील तणाव हा या वाढीचा मुख्य कारण ठरत आहे. 

ट्रम्प यांचा इराणला अल्टिमेटम

अमेरिकेचे राष्ट्राध्यक्ष डोनाल्ड ट्रम्प (Donald Trump)  यांनी इराणला कडक इशारा देत मंगळवारपर्यंत होर्मुझ सामुद्रधुनी खुली करण्याचे आदेश दिले आहेत. अन्यथा ऊर्जा व पायाभूत सुविधांवर मोठे हल्ले करण्याची धमकी दिली आहे.

 यूएईत स्फोट;४ जखमी

खोर फक्कन बंदर (Khor Fakkan Port) येथे इराणी क्षेपणास्त्राच्या अवशेषांमुळे आग लागून ४ जण जखमी झाले. त्यापैकी एकाची प्रकृती गंभीर असल्याची माहिती समोर आली आहे.

 लेबनॉनमध्ये इस्रायली हल्ले; १५ ठार

लेबनॉनमध्ये (Lebanon)  इस्रायलच्या हवाई कारवाईत किमान १५ जणांचा मृत्यू झाला असून; अनेक जखमी झाले आहेत. बेरूतमध्येही मोठे नुकसान झाले आहे.

 इराणची अमेरिकेला प्रत्युत्तरात्मक भूमिका

इराणचे संसदीय अध्यक्ष मोहम्पद बाघेर कालीबफ (Mohammad Bagher Qalibaf)  यांनी ट्रम्प यांच्या धमक्यांना “बेजबाबदार” म्हणत तीव्र निषेध नोंदवला. “युद्धातून काही साध्य होणार नाही,” असे त्यांनी स्पष्ट केले.

 विमान प्रवास महागणार

एअर एशिया एक्सने (AirAsia X)  वाढत्या इंधनदरामुळे तिकिटांचे दर वाढवण्याचा आणि काही उड्डाणे कमी करण्याचा निर्णय घेतला आहे. यामुळे प्रवाशांच्या खिशावर परिणाम होणार आहे.

जागतिक संकटाची भीती वाढली

संयुक्त राष्ट्र सुरक्षा मंडळाकडे (United Nations Security Council)  बहरीन आणि यूएईने हस्तक्षेपाची मागणी केली आहे. हा प्रश्न केवळ प्रादेशिक न राहता जागतिक स्थैर्य, अन्न व ऊर्जा सुरक्षेसाठी धोका ठरत असल्याचे मत व्यक्त करण्यात आले आहे.

 परिणाम काय होणार?

पेट्रोल-डिझेल दर वाढण्याची शक्यता

विमान तिकीट व वाहतूक खर्च महागणार

जागतिक महागाई वाढण्याची भीती

पुरवठा साखळीवर मोठा परिणाम

एकूणच, होर्मुझ सामुद्रधुनीतील तणावामुळे जागतिक अर्थव्यवस्थेवर गंभीर परिणाम होण्याची चिन्हे दिसत आहेत. पुढील काही दिवस अत्यंत निर्णायक ठरणार आहेत.