सुनेत्रा पवारांच्या नियुक्तीनंतर पार्थ पवारांच्या नावाचीही चर्चा
मुंबई : राष्ट्रवादी काँग्रेसचे (अजित पवार गट) अध्यक्ष आणि राज्याचे उपमुख्यमंत्री अजित पवार यांच्या निधनानंतर रिक्त झालेल्या पदावर त्यांच्या पत्नी आणि राज्यसभा खासदार सुनेत्रा पवार यांची नियुक्ती निश्चित झाली आहे. आज, शनिवारी (३१ जानेवारी २०२६) सायंकाळी त्या उपमुख्यमंत्रीपदाची शपथ घेतील. महाराष्ट्राच्या इतिहासात या पदावर विराजमान होणाऱ्या त्या पहिल्या महिला ठरतील.
अजित पवार यांच्या निधनानंतर निर्माण झालेली पोकळी भरून काढता येणे शक्य नाही. राष्ट्रवादी काँग्रेसच्या विधीमंडळ पक्षाची आज दुपारी २ वाजता विधानभवनात बैठक होणार आहे. या बैठकीत सुनेत्रा पवार यांची विधीमंडळ पक्षनेतेपदी अधिकृत निवड केली जाईल, अशी माहिती ज्येष्ठ नेते छगन भुजबळ यांनी दिली. त्यानंतर सायंकाळी ५ वाजता 'लोकभवन' येथे एका साध्या समारंभात त्यांचा शपथविधी पार पडणार आहे.
सुनेत्रा पवार आज पहाटेच आपला मुलगा पार्थ पवार यांच्यासह मुंबईतील 'देवगिरी' या शासकीय निवासस्थानी दाखल झाल्या. अजित पवार यांचे बुधवारी बारामती येथे विमान अपघातात दुर्दैवी निधन झाले होते. या घटनेनंतर पक्षाची धुरा सुनेत्रा पवार यांच्याकडे सोपवण्याचा निर्णय घेण्यात आला आहे.
या राजकीय घडामोडींवर प्रतिक्रिया देताना मुख्यमंत्री देवेंद्र फडणवीस यांनी सांगितले की, उपमुख्यमंत्रिपदाबाबत राष्ट्रवादी काँग्रेस जो निर्णय घेईल, त्याला आमचा पाठिंबा असेल. आम्ही अजित दादांच्या कुटुंबाच्या आणि पक्षाच्या पाठीशी खंबीरपणे उभे आहोत. दुसरीकडे, राष्ट्रवादी काँग्रेसचे (शरदचंद्र पवार गट) अध्यक्ष शरद पवार यांनी मात्र या घाईघाईने केलेल्या नियुक्तीवर आश्चर्य व्यक्त केले असून, हा त्यांच्या पक्षाचा निर्णय असल्याचे म्हटले आहे.
सुनेत्रा पवार या सध्या राज्यसभेच्या सदस्य आहेत. त्यांनी २०२४ मध्ये बारामती लोकसभा मतदारसंघातून सुप्रिया सुळे यांच्याविरोधात निवडणूक लढवली होती. आता त्या राज्याच्या राजकारणात महत्त्वाची भूमिका बजावणार असून, त्यांच्या रिक्त होणाऱ्या राज्यसभा जागेवर पार्थ पवार यांची वर्णी लागण्याची शक्यता वर्तवण्यात येत आहे.
