पणजी : गोव्याला (Goa) आयुर्वेद आणि स्वास्थ्य पर्यटनाचे केंद्र बनवण्यासाठी सरकार प्रयत्नशील आहे. या क्षेत्रातील डॉक्टर, संशोधक, उद्योजकांनी पुढाकार घेऊन राज्यात या क्षेत्रातील प्रकल्प सुरू करावेत असे आवाहन मुख्यमंत्री डॉ प्रमोद सावंत यांनी केले. पहिल्या आंतरराष्ट्रीय (International) आयुर्वेदिक आणि वेलनेस संमेलनाच्या उद्घाटन प्रसंगी ते बोलत होते. यावेळी आचार्य बालकृष्ण, खासदार सदानंद शेट तानावडे, डॉ. राजेंद्र बडवे , डॉ. मेघना भागवत, डॉ. पी के प्रजापती, प्रतिमा धोंड व अन्य अधिकारी उपस्थित होते.
मुख्यमंत्री म्हणाले की, राज्य सरकारने नुकतेच गोवा वेलनेस आणि आयुर्वेद (Goa Wellness and Ayurveda) धोरण २०२६ जारी केले आहे. यानुसार आयुष व संलग्न क्षेत्रातील डॉक्टरांना गोव्यात आपली प्रॅक्टीस करणे सुलभ झाले आहे. नवीन धोरणाद्वारे गोव्याची ओळख केवळ ‘सी, सन अँड सँड’ अशी राहणार नाही यासाठी आम्ही प्रयत्न करत आहोत. गोव्यात आयुर्वेदिक संशोधन, निसर्ग स्नेही प्रकल्प, कौशल्य विकास, जबाबदार पर्यटनाला सरकार नेहमीच पाठिंबा देईल. या धोरणाचा सर्व भागधारकांनी फायदा करून घ्यावा. यापुढे हे संमेलन दरवर्षी गोव्यात आयोजित केले जाणार आहे.
ते म्हणाले, आयुर्वेद केवळ एक औषध प्रणाली नसून जगण्याची शैली आहे. यामध्ये शरीर आणि मन, निसर्ग आणि मानवाचा समतोल आहे. आयुर्वेद आजार बरा करण्यासोबत आरोग्याची काळजी देखील घेते. ही औषध प्रणाली सहज आणि किफायतशीर दरात उपलब्ध आहे. आयुर्वेद ही भारताने जगाला दिलेली सर्वात मोठी देणगी आहे. आयुर्वेद आपल्या प्राचीन संस्कृतीच्या मुळाशी नेते. युवा पिढीने या परंपरेचा अभ्यास करणे आवश्यक आहे. भारतीय औषध प्रणालीला यापुढेही राज्य सरकार पाठिंबा देणार आहे.
मधुमेह रुग्णांची संख्या चिंताजनक
पतंजलीचे संचालक आचार्य बालकृष्ण म्हणाले की, गोव्यात दर चार पैकी एका व्यक्तीला मधुमेह आहे. आयुर्वेदिक उपचार पद्धतीद्वारे हे प्रमाण कमी करण्यासाठी प्रयत्न झाले पाहिजेत. काही पाश्चात्य संस्था भारतीय आयुर्वेदिक औषधांचे पेटंट घेण्याचे प्रयत्न करत आहेत. याकडेही लक्ष दिले पाहिजे.
