हरमल : मूल्यवान वस्तू किंवा रोख रक्कम सापडल्यास ती स्वतःकडे ठेवण्याचे प्रकार अनेकदा घडतात; परंतु प्रामाणिकपणा दाखवणारी माणसेही समाजात अजून आहेत, हे हरमल खालचावाडा येथील मच्छिमारांनी सिद्ध केले आहे.
दि. २९ नोव्हेंबर रोजी रात्री १० वाजण्याच्या सुमारास एका परदेशी पर्यटक महिलेची रोख रक्कम, पासपोर्ट आणि महत्त्वाचे दस्तावेज असलेली बॅग अज्ञात चोराने चोरून नेली. दुसऱ्या दिवशी ३० नोव्हेंबर रोजी पहाटे विमानतळाकडे रवाना होण्याच्या तयारीत असताना तिच्या लक्षात आले की बॅग गायब आहे. त्यानंतर सीसीटीव्ही फुटेजची पाहणी करण्यात आली असता, एक व्यक्ती दबा धरून बसलेला आणि संधी साधून बॅग घेऊन पळून गेलेला दिसून आला.
दरम्यान, त्याच पहाटे समुद्रात जाण्याच्या तयारीत असलेल्या स्थानिक मच्छिमार ग्लेडस्टन कार्दोज यांना त्यांच्या होडीजवळ सदर बॅग आढळून आली.
प्रामाणिकपणाचे दर्शन घडवत त्यांनी तत्काळ ही बॅग माजी पंच प्रवीण वायंगणकर, समाज कार्यकर्ते हरेश मयेकर आणि केशव नाईक यांच्याकडे सुपूर्द केली.
यानंतर तिघांनी मिळून बॅग मांद्रे पोलीस स्टेशनमध्ये अधिकारी गोविंद फटनाईक यांच्या ताब्यात दिली. पोलिसांनी संबंधित परदेशी महिलेला बोलावून बॅग तिच्याकडे परत केली.
याप्रसंगी प्रामाणिकतेचे दर्शन घडवणाऱ्या ग्लेडस्टन कार्डोझ, केशव नाईक, हरेश मयेकर आणि प्रवीण वायंगणकर यांचे सर्वत्र कौतुक होत आहे.
