दक्षिण गोव्यात १ जानेवारी ते ३१ ऑक्टोबर या दहा महिन्यांच्या कालावधीत ९८ अपघातांमध्ये १०२ जणांचा मृत्यू झाला. ऑक्टोबरची आकडेवारी पाहिल्यास ९ जणांचा अपघाती मृत्यू तर १२ जण गंभीर जखमी झालेले आहेत. अपघाताची संख्या कमी होण्यासह मृत्यूंचे प्रमाण कमी करण्यासाठी अधिक जनजागृती व नियमांचे पालन आणखी कडक करण्यावर भर देण्याची गरज आहे.
अपघाती मृत्यूची संख्या शून्यावर आणण्यासाठी नियमांचे कडक पालन व जागृतीची आवश्यकता आहे. वाहतूक पोलिसांकडून मिळालेल्या माहितीनुसार, दक्षिण गोव्यात यावर्षी ऑक्टोबरपर्यंत १०२ जणांचा अपघाती मृत्यू झाला आहे. यात फोंडा पोलीस परिक्षेत्रात सर्वाधिक २१ तर वेर्णा परिक्षेत्रात २० जणांचा अपघाती मृत्यू झालेला आहे. गेल्यावर्षी याच कालावधीत झालेल्या अपघाती मृत्यूंपेक्षा यावर्षी अपघात व मृत्यूंची संख्याही कमी झालेली आहे. मडगाव पोलिसांच्या परिक्षेत्रात ५ जणांचा मृत्यू आणि १२ जण गंभीर जखमी, मायणा-कुडतरी परिसरात ८ जणांचा अपघाती मृत्यू आणि ४ जण गंभीर जखमी, कुंकळ्ळीत ५ जणांचा मृत्यू आणि दोघे जखमी, वेर्णा परिक्षेत्रात २० जणांना अपघाती मृत्यू व १० जण जखमी, वास्कोत १३ जणांचा मृत्यू आणि १८ जण जखमी, केपेमध्ये तिघांचा मृत्यू आणि तिघे जखमी, कुळे भागात ४ अपघातात ५ मृत्यू व ७ जण जखमी, म्हार्दोळ येथे एक मृत्यू व ६ जखमी, कुडचडे व सांगे भागात प्रत्येकी एक अपघाती मृत्यू व एकजण जखमी, कोलवात ५ जणांचा मृत्यू व १३ जण जखमी, काणकोणात ४ अपघातात ४ मृत्यू व दोघे जखमी, फातोर्डा भागात ५ मृत्यू व १६ जण जखमी झालेले आहेत. ऑक्टोबरपर्यंत दहा महिन्यात १५२ जण अपघातात जखमी झालेले आहेत.
वाहतूक पोलिसांनी दिलेल्या माहितीनुसार, गेल्यावर्षी ३१ ऑक्टोबरपर्यंत दक्षिण गोव्यात ११२ अपघातात १२१ जणांचा मृत्यू आणि १६१ जण जखमी झाले होते. यावर्षी अपघातासह अपघाती मृत्यूंमध्ये घट झालेली आहे. मात्र, गेल्यावर्षीच्या आकडेवारीचा विचार करता ही घट कमी दिसते. पण मृत्यूचे प्रमाण पाहता अजूनही वाहतूक नियमांचे पालन करणे याबाबत वाहनचालकांचे दुर्लक्ष दिसून येते. खड्डेमय रस्ते वाहतुकीसाठी योग्य करण्याचे आव्हानही सरकारसमोर आहे. रस्त्यांची डागडुजी वेळेत होत नाही. नव्याने बांधलेल्या रस्त्यांवरही खड्डे पडतात व अपघाताला कारणीभूत ठरतात. याशिवाय अतिवेग जीवघेणा ठरत आहे.
रस्त्यावरील नियम मोडल्यास होणारी दंडात्मक कारवाई, महसूल गोळा करण्याचे साधन होता कामा नये. त्यातून शिस्तीचे धडे वाहनचालकांना मिळण्याची गरज आहे. अपघाताला कारणीभूत ठरणारे रस्ते सुरळीत करणे, धोकादायक ठिकाणी फलकांची, गतिरोधकांची उभारणी, पथदीप उभारणी व देखभाल घेणे, सिग्नल यंत्रणा योग्य करणे यासह वाहतूक पोलिसांची दररोजची रस्त्यांवरील उपस्थिती अनेक अपघात कमी करू शकतील.
- अजय लाड
