८.९८ लाखांचे ड्रग्ज प्रकरण : वागातोर येथे केली होती कारवाई
पणजी : घटनास्थळी ड्रग्जचा अहवाल सकारात्मक आला होता. त्यामुळे प्रथमदर्शनी पुरावे असल्याचे निरीक्षण नोंदवून न्यायालयाने बडतर्फ पोलीस प्रशिक्षणार्थी करण गोवेकर याच्या विरोधात आरोप निश्चित करण्याचा आदेश जारी केला आहे. याबाबतचा आदेश मेरशी येथील अतिरिक्त सत्र न्या. विजया आंब्रे यांनी दिला.
गोवा पोलिसांच्या अमली पदार्थ विरोधी पथकाने (एएनसी) गुप्तहेरांच्या माहितीवरून २२ मार्च २०२५ रोजी वागातोर परिसरात सापळा रचला होता. एएनसीच्या पथकाने त्या ठिकाणी संशयास्पदरित्या फिरणाऱ्या करण गोवेकर (३३, हणजूण) याला ताब्यात घेऊन झडती घेतली होती. त्यावेळी त्याच्याकडून ८.९८ लाख रुपये किमतीचे ३७ ग्रॅम कोकेन, ३७ ग्रॅम मेथाम्फेटामाइन आणि १५ ग्रॅम उच्च दर्जाच्या एक्स्टसी टेबलेट्स जप्त केल्या. या प्रकरणी एएनसीने त्याच्याविरोधात गुन्हा नोंदवून अटक केली. त्यानंतर एएनसीने सत्र न्यायालयात संशयिताविरोधात आरोपपत्र दाखल केले. याच दरम्यान संशयिताने मेरशी येथील उत्तर गोवा जिल्हा व सत्र न्यायालयात जामीन अर्ज दाखल केला. तो न्यायालयाने फेटाळून लावल्यानंतर संशयित गोवेकर याने गोवास्थित मुंबई उच्च न्यायालयात जामीन अर्ज दाखल केला. जप्त केलेल्या ड्रग्जचे प्रमाण परिवर्तनीय (variable quantity) असल्याचे निरीक्षण नोंदवून करण गोवेकरला सशर्त जामीन मंजूर केला.
दरम्यान, न्यायालयात खटल्याची सुनावणी झाली असता, सरकारी अभियोक्ता दर्शन गावस यांनी युक्तिवाद मांडून संशयिताकडून जप्त केलेल्या ड्रग्जचा अहवाल घटनास्थळी सकारात्मक आला होता. हा अहवाल ड्रग्ज डिटेक्शन यंत्रणेद्वारे (drug detection kit) केला होता. असे निरीक्षण नोंदवून न्यायालयाने गोवेकर याच्या विरोधात आरोप निश्चित करण्याचा आदेश दिला.
संशयित करण गोवेकर याच्या विरोधात विनयभंगाचा गुन्हा नोंद झाला होता. यामुळे प्रशिक्षण घेत असताना त्याला पोलीस सेवेतून बडतर्फ करण्यात आले होते.
