काही तासांतच आरोपी अटकेत : दरोडेखोरांना झाली होती सक्तमजुरी
वास्को : बायणातील दरोड्याच्या निमित्ताने सुमारे ३३ वर्षांपूर्वी वास्को शहर भागात भरदिवसा झालेल्या दरोड्याबाबतच्या वास्कोवासीयांच्या आठवणी जाग्या झाल्या. त्या दरोड्यातील दरोडेखोरांना अवध्या काही तासांमध्ये अटक करण्याची कामगिरी तत्कालीन पोलीस उपनिरीक्षक व विद्यमान निवृत्त पोलीस अधीक्षक सॅमी तावारिस, तत्कालीन उपनिरीक्षक उदय नाईक, उपनिरीक्षक व निवृत्त उपअधीक्षक गजानन प्रभूदेसाई व इतरांनी केली होती. त्या सात दरोडेखोरांना दहा वर्षाची सक्तमुरीची शिक्षा झाली होती.
३१ मे १९९३ रोजी सकाळी अकरा साडेअकराची वेळ होती. मुरगाव तालुका सहाय्यक भाग शिक्षणाधिकारी कार्यालयातील कॅशियर यशवंत बांदोडकर, सहाय्यक भाग शिक्षणाधिकारी आंद्रांदे, क्लार्क लता व इतर दोन शिपाई असे पाचजण भारतीय स्टेट बँकेतून सुमारे सहा लाख रुपयांची रोकड घेऊन निघाले होते. त्याकाळी शिक्षकांना भाग शिक्षणाधिकारी कार्यालयात वेतन वितरित केले जात होते. त्यासाठी सदर रोकड नेली जात होती. बांदोडकर यांच्याकडे चार लाख तर शिपायाकडे दोन लाख रुपये असलेली बॅग होती. ते पाचजण अंतर्गत रस्त्याने रोकड घेऊन कार्यालयाकडे येत असतानाच कोसंबी बिल्डिंगजवळ अचानक काहीजणांनी चॉपर, कोयत्यांनी हल्ला केला. त्यांनी बांदोडकर व शिपायाच्या हातातील रोकडच्या बॅगा ओढण्याचा प्रयत्न केला. मात्र, शिपाई बॅगेसह कार्यालयात धावला. इकडे दरोडोखोर बांदोडकर यांच्या हातातील बॅग ओढू लागले. परंतु बांदोडकर बॅग देईनात. त्यामुळे त्या दरोडेखोरांपैकी एकाने त्यांच्या हातावर चॉपरचा वार केला. त्यामुळे बांदोडकर यांनी हातातील बॅग आंद्रादेकडे फेकली. त्यावेळी दरोडेखोरांनी आंद्रादेवर हल्ला करण्याचा प्रयत्न केला. तेव्हा जखमी बांदोडकर यांनी हल्लेखोराला मागे खेचले. त्यामुळे त्या हल्लेखोराने बांदोडकर यांच्या डोक्यावर चॉपरचा वार केल्याने, बांदोडकर रक्तबंबांळ झाले. त्यानंतर ते दरोडेखोर चार लाखाची रोकड घेऊन व्हॅनमधून पळाले. याप्रकरणी पोलिसांना माहिती देण्यात आल्यावर पोलिसांनी त्वरित हालचाली केल्या.
तत्कालीन निरीक्षक आपा तेली व उपअधीक्षक मोराईस यांच्यासह उपनिरीक्षक सॅमी तावारिस, उदय नाईक, गजानन प्रभूदेसाई व इतर पोलीस त्या दरोडेखोरांना शोधण्यास निघाले. त्याकाळी एकच जीप असल्याने अॅड. राजन नाईक यांनी आपल्या फियाटमध्ये सॅमी तावारिस व इतरांना घेऊन ते मांगोरहिल मार्गाने निघाले. तर चिखली बाजूने उदय नाईक वगैरे जीपने निघाले. मांगोरहिल येथे एका सायकलला त्या व्हॅनने ठोकरल्याची माहिती मिळाली. त्या व्हॅनचा अपुरा क्रमांक मिळाला होता. त्याआधारे ते पुढे निघाले असताना ती व्हॅन पुन्हा वास्कोकडे येत असल्याचे दिसले. तावारिस यांनी अडवून वाहनचालकाकडे चौकशी केली. आपली व्हॅन कासावलीपर्यंत भाड्याने ठरविली होती असे चालकाने सांगितले. त्याला घेऊनच सॅमी तावारिस वगैरे पुढे निघाले. कासावली येथे त्या दरोडेखोरांचा शोध घेत असताना दोन युवक पायी जात असल्याचे दिसले. त्यांना त्या व्हॅनचालकाने ओळखल्यावर, त्यांना धरण्यासाठी तावारिस यांनी चालत्या वाहनातून उडी मारली.ते पाहून दरोडेखोर पळू लागले.त्यापैकी एकाचा तावारिस यांनी पाठलाग सुरु केला.तथापी तो हाती लागेना.तेव्हा त्यांनी पिस्तूलातून एक फेरी हवेत झाडली.परंतू दरोडोखोराने शेतातून धावण्याचा प्रयत्न केला. फुटबॉलपटू असलेल्या तावारिस यांनी कुंपणावरून उडी घेत त्याला पकडले. त्याच्याकडे चौकशी केल्यावर त्याने आपले इतर साथीदार कासावली येथे असल्याचे सांगितले. त्यानंतर इतर पोलिसांच्या मदतीने त्यांनाही पकडण्यात आले.
मात्र, चार लाख रुपये असलेली बॅग घेऊन मास्टरमाईंड व्हिन्सी हा केरळमध्ये पळाला होता. व्हिन्सी याची प्रेयसी कासावली येथे राहत होती. त्यामुळे इतर दरोडेखोर तेथे थांबले होते आणि पोलिसांच्या तावडीत सापडले. त्यानंतर उदय नाईक यांच्या नेतृत्वाखाली एक पोलीस पथक केरळला गेले. तेथे तपास करून व्हिन्सी याला अटक करून तीन लाखांची रोकड जप्त केली.
कामगिरीचे कौतुक... पण दखल नाही!
त्याकाळी पोलिसांनी या धाडसी दरोड्याचा तपास अवघ्या दोन तीन तासांमध्ये लावल्याने त्यांचे कौतुक झाले होते. त्या दरोडेखोरांना दहा वर्षाची शिक्षा झाली होती. त्यापैकी व्हिन्सी हा एका अपघातात मरण पावला. यशवंत बांदोडकर व आंद्रादे यांनी जे धाडस दाखविले त्याबद्दल राज्य सरकारतर्फे त्यांना १९ डिसेंबर १९९५ ला मेरिट सर्टिफिकेट देण्यात आली. मात्र, सॅमी तावारिस व इतरांच्या कामगिरीची कोणीही दखल घेतली नाही.
